NEGROS OCCIDENTAL (PIA) — Nagpaandam ang isa ka doktor sang gobyerno nga ang mga may hilanat nga nagalawig na sang duha ka adlaw ang nagakadapat magpakonsulta sa gilayon agud matatapan ilabi na kon dengue ang balatian.
Suno kay Dr. Erika Joana Villanueva Caperonce nga Infectious Disease Consultant sang Corazon Locsin Montelibano Memorial Regional Hospital (CLMMRH) nga nagaduging ang dengue sa karon kag ang temprano sini nga pagpakonsulta sa doktor ang makaluwas sang kabuhi sang isa ka tawo bangud mahatagan siya sang nagakaigo nga bulong.
Nahibaluan nga ang dengue tuga sang kagat sang lamok nga may puti nga kolor sa paa kag lawas.
Nagpanawagan man si Caperonce sa mga ginikanan nga magbantay kon ang ila bata may hilanat kag gulpi lang madula sa dason nga inadlaw bangud amo ini ang tion nga may posibilidad maganubo ang platelet sang pasyente kag magtuga sang komplikasyon sa lawas.
Ang mga sintomas sang dengue nagalakip sang sakit sa ulo, mata, kaso-kasuan, palanakit sa kalawasan, palanuka, rashes, kag manubo nga platelet. Ang mga pasyente nga nagapakita sang amo nga mga sintomas ang kinahanglan dal-on sa gilayon sa ospital, pahayag niya.
Nagdugang si Caperonce sa pagpaathag sang pila pa ka mga sintomas nga dapat tandaan kaangay sang tuman ka sakit sang tiyan, mahumok nga pus-on kag masakit kon matandog, nabudlayan sa pagginhawa, palangapoy sang kalawasan kag pagtaas sang presyon.
Iya ginapanawagan nga ang mga katapo sang komunidad nga magpatuman sang 4S nga istratehiya nga amo ang mga masunod; 1. Search and Destroy o pangitaon kag gub-on ang gina itlogan sang mga lamok, 2. Secure Self-Protection measures o magsuksok sang panapton agud ma protehiran ang kaugalingon kaangay sang pag-usar sang bayo nga malagba kag maggamit sang insect repellents, 3. Seek Early Consultation o temprano nga pagpakonsulta sang hilanat nga nagadugay sang duha ka adlaw, kag 4. Support Fogging o pag-spray sang mga komunidad nga may mataas nga kaso sang dengue.
Sang damlag lang, ginpahayag ni Dr. Girlie Pinongan nga Provincial Health Officer sang Negros Occidental nga ang probinsya ang nagreport sang masobra 1,500 nga kaso sang dengue nga nagalakip sang anom nga napatay bangud sang dengue humalin Enero 1 tubtob Agosto 3 karon nga tuig. (AAL/Lljr/ PIA6 Negros Occidental)
