SYUDAD SANG ILOILO — Dako ang pagpasalamat sang mga miyembro sang Babaye Bangon Batad Chapter sa teknikal nga bulig sang Department of Science and Technology (DOST)-Iloilo tuhoy sa ginpatigayon nga programa “Building a Greater Batad through Women Empowerment.”
Suno kay Pilar Banico, presidente sang Babaye Bangon Batad Chapter, nangin alagyan ang pagtukod sang mushroom production facility sa pagpasanyog sang palangabuhian sang mga kababainhan.
Nalakip sa mga nakabenepisyo sini amo ang mga babaye nga nakalampuwas batok sa kapintas ukon VAW survivors, mga VAW desk officers, solo parents, 4Ps beneficiaries, kag mga katigulangan.
“Bisan sa amon nga produkto, makabaligya kami kag ini ang dugang nga income sa amon nga mga kababainhan,” ang pagpakigbahin ni Banico.
Sila ang ginpanghanas sa pagsagod sang uhong, basic entrepreneurship, simple bookkeeping, financial literacy, kag packaging and labeling.
Nakabaton man ang asosasyon sang mga liso sang utanon kag mga gamit sa hardin para sa pagtanum sang utanon kag produksyon sini.
“Nakita man siguro sang taga DOST nga kinahanglan namon ang project para sa pagbulig man sa amon nga mga miymebro, ” suno kay Banico.
Para naman kay Regina Lobaton, miyembro sang asosasyon, ang abilidad nga naangkon ilabi na sa mga paghanas nga ginpatigayon ang makabulig man sa pagdumala sa pinansyal nga aspeto sang pamilya.
Sa pihak nga bahin, nagpa-alintun man sang apresasyon ang Local Disaster Risk Reduction Management Office sa ginhatag nga 30 ka mga hand held radio nga magamit sa panahon sang emerhensiya.
Ginpahayag ni LDRRMO Gilbert de la Cruz nga ang 24 nga mga barangay sang banwa ang ginhanas sa pagamit sini lakip man ang Project SIGNAL (Strategic Incident Georeferencing for Nationwide Alertness) sang DOST.
“Tungod sa ini nga proyekto, makabulig gid ini dako sa pagpadasig sang aton pag-implement sang programa naton sa disaster risk reduction and management,” sambit ni de la Cruz.
Samtang, ginpabutyag ni Wilsa de la Cruz, isa ka daycare worker, ang kalangkag sang mga day-care nga mga kabataan nga nangin benepisyaryo sang supplemental feeding program.
“Ang nutribun dako nga bulig sa mga kabataan kay besides sa amon nga supplementary feeding, may ara kami meals, kag may snacks pa gid, ” pahayag ni Wilsa dela Cruz.
Napaidalom ang proyekto sa Community Empowerment through Science and Technology (CEST) nga programa sang DOST nga may tinutuyo sa pagpa-uswag sang komonidad pinaagi sa mga siyentipiko nga mga inisyatibo sa patag sang pagpasanyog sang palangabuhian, ikaayong lawas kag nutrisyon, kag pagnubo kag pagdumala sang risgo dulot sang mga kalamidad.
Ginbuylugan man ini patigayon sang banwa sang Batad kaupod ang Batad Municipal Police Station kag Iloilo provincial government -Local Economic Development and Investment Promotion (LEDIP) Center. (AAL/LMLE/PIA Iloilo)
