Photo courtesy of DOLE Western Visayas
SYUDAD SANG ILOILO (PIA) — Nagpatigayon sang Labor Run 2025 sang Abril 26 ang Department of Labor and Employment (DOLE) sa Western Visayas bilang “prelude” sa mga aktibidades sang Labor Day sa Mayo 1.
Masobra 600 ka mga partisipante ang nagtambong nga ginbug-osan sang mga empleyado sang gobyerno, nagatrabaho sa pribado nga sektor, miyembro sang labor union, kag ila mga pamilya, kon sa diin nagtilipon para sa pagsakdag sang ikaayong-lawas, paghiliusa, kag apresasyon sa mga nagatrabaho nga mga Pilipino.
Nag-umpisa ang fun run timprano pa sa kaagahon, kon sa diin ginsunod ang 5K nga ruta sa Sunset Boulevard sa syudad sang Iloilo.
May ginhiwat nga opening program nga ginpangunahan ni DOLE Western Visayas director Sixto T. Rodriguez Jr., kon sa diin iya ginhatagan pagtamod ang ikaayong lawas, pag-abyanay, kag padayon nga adbokasiya para sa desente nga trabaho kag patas nga labor practices.
Sa bug-os nga race, ginmintinar ang kaluwasan kag kahilwayan paagi sa bulig sang volunteer marshals, medical teams, kag local law enforcement.
May yara man hydration stations kag first aid tents nga ginbutang sa estratehiko nga mga lokasyon sa ruta bilang suporta sa mga nagpasakop.
May ginpanghatag man nga snacks kag tokens, samtang ginhatagan sang special awards ang top finishers sa male kag female categories.
Suno sa departamento, ang Labor Run 2025 tinutuyo nga palambuon ang community engagement kag i-selebrar ang kakusog kag paghiliusa sang bug-os nga Filipino workforce. (AAL/AGP/PIA kalakip ang mga balita gikan sa DOLE Western Visayas)
