DAVAO DE ORO (PIA) — Pagpatukod sa Super Health Center, ongoing construction sa extension sa birthing facility ug renovation sa Out Patient Department (OPD) area sa Rural Health Unit (RHU), ug free medical outreach sa mga barangay sa lungsod, pipila lamang kini sa mas gipakusgang serbisyong medikql sa LGU Nabunturan sa pagpangulo ni Mayor Myrocel Clarin Balili.
• Super Health Center
Gipahimutang sa Barangay Manat, niining lungsod. Gisugdan ug construct niadtong February 21, 2023, ug gilaomang matapos sulod sa 120 ka adlaw o sa June 30, 2023.
Dako kining tabang sa katawhan hilabina kadtong layo sa Poblacion ug nanginahanglan ug medikal nga atensyon. Ang mga serbisyo ug pasilidad nga mahanyag niini labaw pa sa kung unsa ang anaa sa Rural Health Unit o RHU.
Ang maong proyekto gipondohan sa Department of Health (DOH) ug P11, 000, 000.00.
• Extension of Birthing Facility, and Renovation of Out Patient Department (OPD)
Sa tinguha nga mas daghan ang ma serbisyohan sa atong RHU, ug mamahimong mas komportable ang mga pasyente ug watcher, mas gipanindot ug gipadak-an pa ang atong OPD, ug gidugangan usab ang imprastraktura sa atong birthing facility o paanakan.
Gilaomang matapos ang konstruksyon sa June 28, 2023, ug ang maong proyekto adunay contract amount nga P14,049,591.03.
• Free Medical Outreach
Isip usa sa mga prayoridad nga programa sa kasamtangang administrasyon, padayon ang pagpahitabo ug Free Medical Outreach ang atong mga personahe sa Municipal Health Office (MHO).
Ang medical team naga bisita sa matag barangay alang sa paghatag ug libreng konsultasyon ug libreng medisina sa mga molangkob niini.
Sa bag-ohay lamang, gi serbisyohan sa atong medical team ang Barangay San Roque kung diin 49 ka pasyente ang naasikaso, ug Barangay Anislagan kung diin 51 ka pasyente ang naka benepisyo sa maong programa.
Pipila lamang kini sa mga proyekto ug programa nga gipaningkamotang mahatud sa Lokal nga Panggamhanan sa Nabunturan ngadto sa katawhan niini.
Nagpamatuod lamang kini nga ang LGU Nabunturan, ubos sa pagdumala ni Mayor Myrocel Balili, naglihok, ug padayong nagahatud ug tiunay nga serbisyo inubanan sa gugma kanatong mga Nabunturanon. (PR-LGU Nabunturan)
