SYUDAD SANG ILOILO (PIA) — Ginhingyo sang Iloilo Provincial Health Office (IPHO) ang local government units (LGUs) sa probinsya nga hatagan sang nagakaigo nga suporta kag pundo ang mga programa angut sa nutrisyon sa ila komunidad.
Ginpahayag ni IPHO head Dr. Maria Socorro Colmenares-Quiñon sa isa ka press conference sang Hulyo 9 nga dapat mahatagan sang husto nga pundo ang mga programa sa nutrisyon agud nga mapadayon ang pagnubo sang malnutrisyon sa probinsya.
Dugang pa ni Quiñon nga ang pagpanubo sang mga kaso sang malnutrisyon sa Iloilo ang dapat nga buligan sang tanan nga sektor, ilabi na ang LGUs.
“We are enjoining all LGUs nga dapat may budget gid sa ila Local Nutrition Action Plan para ma-address ini kay bal-an ta man nga stunted body will lead to stunted brain, stunted life. Amu na dapat subong address ta na or else, this will continue to the next generation,” siling sini.
Suno kay Quiñon, handa man maghatag sang bulig ang gobyerno probinsyal pinaagi sa mga programa sang National Nutrition Council (NNC), Department of Health (DOH), Department of Social Welfare and Development (DSWD), kag Department of Agriculture (DA).
Sa pihak nga bahin, ginpahayag ni Dr. Wendel Marcelo, Nutrition Action Officer sang probinsya, nga ang kampanya kontra malnutrisyon ang nagakinahanglan sang isa ka holistic nga pamaagi, nga wala lamang nasentro sa paghatag sang pagkaon, kundi sa paghatag man sang mga programa nga makapauswag sang ikaayong lawas kag sosyo-ekonomiko nga kahimtangan sang mga pamilya.
Ginhatagan man ni Marcelo sang importansya ang mga interbensyon nga ginpatigayon sang pila ka stakeholders nga naga-amot sa padayon nga pagnubo sang kaso sang malnutrition sa Iloilo, pareho sang Mingo Meals Nutrition Program sang Negrense Volunteers for Change Foundation, Philippine Multi-Sectoral Nutrition Project (PMNP) sang DOH, ang Tutok Kainan Dietary Supplementation Program sang NNC, kag ang mga inisyatibo sa nutrisyon sang Department of Education (DepEd).
Sandig sa datos sang IPHO, nagnubo ang kaso sang “stunting” halin 8.3 percent sang 2020, ara na lang ini sa 4.84 percent sang 2023; samtang nagnaog sa 1.11 percent ang kaso sang “wasting” sang 2023 humalin sa 2.12 percent sang 2020.
May pagnubo man nga nakita sa kaso sang “underweight”sa probinsya kung sa diin ara ini sa 2.44 percent sang 2023 humalin sa 3.47 percent sang 2020; samtang ang kaso sang “overweight” ang nagnubo sa 2.26 percent humalin sa 3.30 percent sang 2020. (AAL/JNH/PIA Iloilo)
