Gipabalaan ni Diocese of Dumaguete Bishop Julito Cortes ang mga PPCRV volunteer alang sa May 12, 2025 national and local elections sa gipahigayong send-off ceremony alang kanilang kaniadtong ika-11 sa Mayo 2025 sa Dumaguete Cathedral. (RAL/PIA7-Negros Oriental)
DUMAGUETE CITY, Negros Oriental (PIA) — Mikabat sa 5,000 ka mga volunteers ang gi-deploy sa Diocese of Dumaguete sa mga tunghaan nga gamiton isip polling center sa adlaw sa piniliay alang sa pag-monitor sa mga panghitabo nga may labot sa piniliay.
Gipanguluhan ni Diocese of Dumaguete Bishop Julito Cortes ang pagpababalaan ug pag-send off sa mga volunteers kaniadtong ika-11 sa Mayo 2025 didto mahitabo sa Cathedral of St. Catherine of Alexandria sa may Dakbabayan sa Dumaguete.
Adunay kapin 150 ka volunteers gikan sa maong parokya ang nitambong sa send-off ceremony.
Gibutyag ni Diocesan Electoral Board (DEB) Lead Convener Msgr. Julius Heruela nga nipahigayon usab og kaugalingong send-off ceremony ang nagkadaiyang parokya sakop sa diyosesis alang sa ilahang mga volunteers.
Mahimong miyembro sa Parish Pastoral Council for Responsible Voting (PPCRV) ang mga volunteers sa simbahan ug mohatag sila og report bahin sa sitwasyon sa mga tunghaan ug piniliay sa ilang lugar sa DEB.
Motabang sab sila sa pag-locate sa mga polling precinct sa mga botante nga nangita sa ilahang presinto.
Gitawag ni Cortes og “missionaries in polling centers” ang mga volunteers isip pagtuman sa sugo nga magbantay sa piniliay
“You bring with you the values of Jesus Christ and bring with you the protection, the love, and the compassion of our Father for you and our people,” matud ni Cortes.
Gi-deploy ang mga PPCRV volunteers ngadto sa mga polling centers gikan Jimalalud ug Siquijor ug sa kinatibuk-an isla sa Siquijor.
Ang upat nga nahibilin nga lungsod ug siyudad sa amihanang Negros Oriental sakop sa hurisdiksyon sa Diocese of San Carlos.
Gipadayag si Bishop Cortes ang iyang pasalamat sa mga volunteers alang sa pagserbisyo nila sa katawhan sa sa umalabot nga piniliay.
Sa laing bahin, mi-awhag si Bishop Cortes sa mga Katoliko sa Negros Oriental nga mobotar subay sa konsensya nga matinud-anon ug sa giya sa ebanghelyo.
“Let’s support CHAMP—Clean, Honest, Accurate, Meaningful and Peaceful Election. Let us unite to be conscious as we cherish the sacred votes of our own. It is our duty as citizens to uphold the welfare of the country by voting the right way,” awhag ni Cortes.
Mi-awhag sab siya sa mga Katoliko nga mo-ampo usa, sa dili pa mobotar.
Gianunsyo sa Commission on Elections Negros Island Region (Comelec-NIR) nga abre na ang mga presinto sugod 5:00 sa buntag hangtod 7:00 sa buntag alang sa mga botante nga naapil sa priority group sama sa mga mapdos, mga tigulang, ug mga Persons with Disability (PWDs).
Magpadayon abre ang mga polling centers hangtod 7:00 sa gabie alang sa uban pang mga botante. (RAL/PIA7-Negros Oriental)
