TAGBILARAN CITY, Bohol (PIA) — Gipalig-on sa kagamhanang probinsiyal ang ilang pakigtambayayong sa mga telecommunication companies uban sa pag-institutionalize sa libreng charging sa mga cell towers sa panahon sa kalamidad.
Gilagdaan ni Gob. Erico Aristotle Aumentado niadtong Nobyembre 26, ang Provincial Ordinance No. 2024-013, nga nagmando sa mga telecom providers ug tower companies sa paghatag og libreng charging sa mga cell site kon mahitabo ang natural ug tinuyo nga kalamidad, apil na ang blackout.
Ang Free Charging at Cell Sites ordinance, nga gimugna ni Board Member Aldner Damalerio, nagtumong sa pagtabang sa mga komunidad sa pagpasiugda sa pagkaandam ug hinanaling pagtubag pinaagi sa network resilience, padayon nga pagkaanaa sa mga serbisyo sa komunikasyon, mobile solutions ug mga kalihokan, ug hinabang aron matabangan ang mga komunidad nga maminusan ang mga risgo sa katalagman.
Matud pa ni Damalerio, ang ordinansa nga mahimong una sa nasud, nagtugot sa mga kaubang Bol-anon sa paghatag access sa kapin sa 300 ka cell site locations sa Bohol alang sa pag-pacharge sa mga gadgets sama sa cellphones, tablets, power banks, portable lamps, fans, mga radyo, mga suga nga pang-emerhensya kung adunay dagkong katalagman.
Awtomatikong magamit ang serbisyo sa Libreng Charging kung ang Sangguniang Panlalawigan modeklarar og state of calamity nga gi-endorso sa Provincial Disaster Risk Reduction Management Council ingon man kung kini nga pagkawala sa kuryente may kalabotan sa katalagman.
Ani nga mga panahon, human gikumpirma sa mga utility companies nga ang pagkapawong sa serbisyo, molapas sa 24 oras, ang telecom service provider mag-gamit og extension cord gikan sa cell site hangtod sa gawas nga perimeter sa estasyon.
Gibutang usab niini ang iskedyul sa charging: 8:30 hangtod 11:30 sa buntag ug 1:30 hangtod 5:30 sa hapon.
Kadtong mo-avail sa serbisyo magdala sa ilang extension cords, cables, ug, kung magamit, mga lingkuranan, lamesa, ug weather cover.
Ang mga cellphone, handheld tablets, emergency lights, portable electric fan, ug power banks lang ang gitugotan nga maka-avail sa charging service.
Ang high-wattage nga mga appliances/ekipo dili tugutan.
Ang dili kinahanglanon nga mga kalihokan gidid-an usab, kini aron maatiman ang daghang mga residente ug dali na mahuman ang charging.
Ang maong ordinansa gipasiugdahan usab nila ni Board Members Tomas Abapo, Jr., Romulo Cepedoza, Lawrence Xavier Ancla, Pacifico Nicanor S. Besas, Jr., Vierna Mae F. Boniel. (ECB/PIA7-Bohol)
