Laragway: BFAR Western Visayas
SYUDAD SANG ILOILO (PIA) — Nagpatigayon sang lima ka adlaw nga paghanas ang Bureau of Fisheries and Aquatic Resources (BFAR) paagi sa iya Fisheries Regulatory and Licensing Division (FRLD) sa syudad sang Iloilo, para mas mapaayo ang kapasidad sang rehiyonal kag probinsyal nga regulatory kag licensing officers sa pag-inspeksyon kag dissection sang commercial fishing vessels kag gears.
Sa sini nga aktibidad, 66 ka licensing officers gikan sa Rehiyon 9, 10, 11, 12, 13, kag Bangsamoro Autonomous Region in Muslim Mindanao (BARMM) ang nagpartisipar man, kon sa diin ang mga topiko ginalakipan sang Code of Conduct for Responsible Fisheries, mga layi kag regulasyon para sa mga operasyon sa pangisdaan, kag paggamit sang commercial fishing vessel fish tracker.
Ginpunto ni BFAR Western Visayas Regional Director Remia A. Aparri ang importante nga papel sang mga opisyales sa pagpatuman sang responsable kag science-based nga mga regulasyon sa pangisdaan.
“You are gatekeepers of sustainability, compliance, and trust in the commercial fishing sector. You are being equipped to do more than just inspect. You are being prepared to understand the impact of your decisions on our ecosystems, our economy, and our fishers’ future,” siling ni Aparri.
Iya man ginpangabay nga paagi sa paghanas, ang mga partisipante mangin inspirado, makakuha sang mas madalom nga pag-intindi, kag mas mangin malig-on ang pangako sa pagtukod sang komersyal nga pangisdaan nga nasandig sa layi.
Ang mga sesyon ginpangunahan sang mga eksperto gikan sa FRLD kag National Marine Fisheries Development Center, lakip na ang praktikal nga mga demonstrasyon sa Iloilo Fishing Port Complex tuhoy sa gear dissection kag Juvenile Trash Excluder Device installation.
Tinutuyo sang aktibidad nga mapabakod ang pagpatuman sang layi, i-modernisa ang paggamit sang datos, kag mapasangkad ang regulatory standards. (AAL/AGP/PIA 6 kalakip ang mga balita gikan sa BFAR Western Visayas)
