SYUDAD SANG ILOILO (PIA) — Ginkumpirma sang Philippine Army nga lima ka ginapahayag miyembro sang New People’s Army (NPA) ang napatay sa isa ka engkwentro nga nagluntad sa Brgy. Aglonok Calinog, Iloilo sang Agosto 9, 2024.
Ginpahayag ni 301st Brigade Commander Brigadier General Michael Samson sa isa ka media interview nga kabahin ang engkwentro sa pursuit operations sang gintingub nga pwersa sang 61st Infantry Battalion (IB), 12th IB kag 82nd IB para malagas ang mga nabilin nga rebelde sa probinsya.
Basi sa pahayag sang Philippine Army Spearhead Troopers, ginkilala nila ang mga napatay nga ginasuspetsahan rebelde nga sanday Aurelio Bosque, Jovelyn Silverio, Armando Rogelio Sabares, Rumulo Ituriaga Gangoso, kag alias Burnok.
Lakip naman sa mga nakuha sa engkwentro ang duha ka M16 Rifles, isa ka M203 Grenade Launcher; isa ka Anti-Personnel Mine (APM); mga bala, pila ka communication kag ICT equipment; subversive documents; kag mga personal nga kagamitan.
Nakipag-angut naman ang Philippine Army sa mga lokal nga panguluhan kag Philippine National Police (PNP) agud makit-an ang tagsa ka pamilya sang mga napatay nga ginapahayag rebelde.
Ginpahayag naman sang 12IB nga ginapatigayon sang ila unit ang pagpalawig sang financial kag burial assistance para sa pamilya sang mga napatay pinaagi sa mga LGUs kag iban pa nga ahensya sang gobyerno, parehas sang Department of Social Welfare and Development (DSWD).
Ginhingyo naman ni 3ID commander Major-General Mario R. Sison ang nabilin nga mga rebelde nga magsungka na para mahatagan sang nagakaigo nga bulig sang gobyerno kag makabalik na sa sosyedad
Suno kag Sison, pinaagi sa Enhanced-Comprehensive Local Integration and Amnesty Programs sang gobyerno, masiguro sang mga rebelde ang mas mabungahon kag makahulugan nga kabuhi upod sang ila mga pamilya.
“Your organization is dying and popular support is turning against you. Don’t suffer the same fate as your companions. Surrender now before it’s too late. Your Army is more than willing to embrace you towards the path to Peace,” dugang pa ni Sison. (AAL/JNH/PIA Iloilo/with reports from Philippine Army Spearhead Troopers)
