BACOLOD CITY (PIA) — Gaka-eksperyensyahan subong sa Negros Occidental ang pag-ulan sa tunga sang nagapadayon nga aktibidad sang Bulkan Kanlaon nga nagapabilin sa Alert Level 3.
Suno kay Office of Civil Defense (OCD) Western Visayas Director kag Regional Task Force Kanlaon Chairperson Raul Fernandez, base sa report sang Department of Social Welfare and Development (DSWD), apektado sang pag-alburuto sang Bulkan Kanlaon ang kabug-usan nga 7,153 ka mga pamilya ukon 21,889 ka mga indibidwal halin sa 21 ka mga barangay sa mga syudad kag munisipyo sang Bago, La Carlota, La Castellana, Moises Padilla, Murcia, Pontevedra, kag San Carlos.
Dugang pa sa risgo dala sang aktibidad sang bulkan, gaka-eksperyensyahan man sa rehiyon ang Shear Line, ukon madamol nga panganod nga may dala nga mabaskog nga pag-ulan, kag ang thunderstorms, ukon madamol pero madasig nga pag-ulan nga may dala nga kilat kag daguob.
Ini nga Shear Line kag thunderstorms nag-apekto sa kapin 2,305 ka mga pamilya ukon 7,320 ka mga indibidwal sa 19 ka mga barangay sa mga siyudad sang Cadiz, Sagay, kag Victorias.
“Ang epekto sang malain nga tiyempo kag aktibidad sang bulkan gintunaan sang mga pagpanghangkat sa bahin sang mga lokal nga otoridad kag disaster response teams,” hambal ni Fernandez sa lenggwahe nga Ingles.
Dugang ya pa, “Kita padayon sa pag-ubra kag pagpaninguha nga mahatag ang suporta kag bulig nga kinahanglan sa mga apektado nga pamilya.”
Suno man kay Fernandez, indi makontrol ang tiyempo kag ang bulkan gani kinahanglan ang tayuyon nga pag-aligmat kag pagbantay sang sitwasyon. (AGP/BPS/PIA Negros Occidental/ Office of Civil Defense)
