Ginbaton ni Arnaiz (tunga) ang livelihood inputs halin sa DOLE 6 paagi kanday Labor and Employment Officer Benigno Cabadon, Jr. (wala) kag Iloilo Field Office staff Hyacinth Gale Siaotong (tuo). (DOLE 6 photo)
SYUDAD SANG ILOILO (PIA) — Naghatag paglaum kay Eduardo B. Arnaiz, isa ka benepisyaryo, ang livelihood inputs para sa sari-sari store gikan sa Department of Labor and Employment (DOLE) 6.
Si Arnaiz, tumandok sang Brgy. Tigtig, Sta. Barbara, Iloilo, naga-obra sadto sa isa ka surveying firm. Ang aksidente nagluntad sang 2016 kung sa diin nabungguan sang isa ka truck ang iya salakyan. Pareho nga tiil sini ang nasamaran kag siya ginpa-idalom sa 15 ka surgeries.
Tungod sa iya kondisyon, nangin imposible na kay Arnaiz nga makapangita sang obra kag sa sulod sang walo ka tuig, siya nagasalig nalang sa iya asawa kag mga kabataan sang iya mga kinahanglanon sa pinansyal kag iya medikasyon.
Ang DOLE 6, paagi sa iya Iloilo Field Office, nakahibalo nga nagakinahanglan sang suporta ang persons with disability (PWD) paagi sa pagpanghatag sang livelihood projects.
Gani, sa ti-on nga nabaton ang rekomendasyon gikan sa local government unit sang Brgy. Tigtig, ginmandu-an ni Regional Director Atty. Sixto Popoy Rodriguez Jr. ang Iloilo Field Office nga hatagan sang nagakaigo nga bulig si Arnaiz.
“Above all, we would like to maintain his dignity, sense of belonging and confidence, and empower him by fostering economic independence and enhancing his quality of life,” suno kay Rodriguez.
Iya man ginpunto ang mandato sang DOLE nga pabakuron ang social inclusion, equal employment opportunity, kag respeto.
“Daku nga bulig ini sang gobyerno sa akon, halungan ko ini kag tinguhaan nga padakuon,” suno kay Arnaiz.
Iya man ginpakigbahin nga ang proyekto magabulig sa iya indi lamang sa pinansyal nga aspeto kundi ini magaserbe man nga “therapy” sa iya trauma nga dulot sang aksidente.
Iya man ginalauman nga ang proyekto makabulig man sa pag-eskwela sang iya bata kag siya mahimo nga makapaidalom sa liwat sa isa pa ka operasyon para sa iya apektado nga tiil. (AAL/AGP/PIA 6 kalakip ang mga balita gikan sa DOLE 6)
