LUGAIT, Misamis Oriental (PIA) — Gisugdan na sa lokal nga pangagamhanan, ubos sa liderato ni Mayor Wellie Lim ug Vice Mayor Roger Lim, ang pagtukod ug pagpalambo sa transportation terminal sa lungsod pinaagi sa ground breaking ug time capsule laying ceremony, Pebrero 27 ning tuiga.
Gibutyag ni Mayor Lim sa iya mensahe nga kini gihimo isip pagsanong sa reklamo sa publiko nga wala kaayo mapusli ang mao nga terminal tungod kay init ug igang busa adunay himoon nga improvement nga world-class design aron kini matubag ug magamit nga terminal.
“Tubag kini sa reklamo sa katawhan nga dili magamit kay wala’y atop ug init,” sumala pa ni Mayor Lim.
Dugang pa niini nga dili niya, matod pa, kinaiya ang magpahigayon og susamang seremonyas.
Ang maong proyekto nahimutang sa National Highway, Purok Masilakon 1, Barangay Poblacion. Ang proyekto nagkantidad ug P10 milyones para sa design ug build nga improvement nga na award ngadto sa ARQ Builder.
Mga buses ug mini buses ang mohapit diri nga nagbiyahi gikan sa dakbayan sa Iligan ug Cagayan de Oro isip pampubliko nga sakyanan. (Lugait MCO/PIA-10/Misamis Oriental)
