MISAMIS ORIENTAL (PIA) — Nagpahigayon og panagpulong, Marso 10, ang lokal nga pangagamhanan sa munisipyo sa Manticao, uban ang mga empleyado niini, alang sa panaghisgot kabahin sa mga peligro sa kalawasan nga Misamis Oriental kabahin sa pagpanigarilyo.
Ang maong kalihukan atol sa Awareness Celebration of World No Tobacco Day nga gipasiugda sa Municipal Health Office nga nag-awhag sa mga manigarilyohay sa hinay-hinay nga pag-undang niini nga bisyo.
“Dili lang kini para sa inyong kaugalingon apan para sa inyong mga mahal sa kinabuhi,” pamahayag ni Dr. Eddy Paul L. Mallillin, Municipal Health Officer.
Dugang niya, ang sigarilyo ug ang vape susama og kadaut nga mahatag sa lawas busa sayop ang pagtoo nga mo-undang sa pag-sigarilyo pero migamit og vape.
Gipasabot usab ni Mayor Stephen S. Tan ngadto sa mga amahan o adunay pamilya nga labaw’ng maapektuhan ang mga miyembro sa pamilya sa mga gapanigarilyo, labina kung naa sa ilang balay.
“Luoy ang mga anak nga kanunay magsakit, labina kung gagmay pa sila, busa tungod ug alang kanila, unta undangan ang pagpanigarilyo,” matud ni Tan. (Manticao LGU/PIA-10/ Misamis Oriental)
