MISAMIS ORIENTAL (PIA) — Gidawat ni Mayor Stephen S. Tan ang plaque of commendation gikan sa lokal nga pangagamhanan sa Iligan City isip pag-ila sa Manticao alang sa mga koordinasyon ug kolaborasyon niini diha sa disaster preparedness sa duha ka local government units (LGUs).
Personal nga gitunol ni Mayor Frederick Siao ang pasidungog atol sa 1st Quarter Iligan City Disaster Risk Reduction and Management Council Meeting.
Gitunol usab ni Mayor Tan ngadto kang Mayor Siao ang plaque ug certificate of commendation isip pasalamat sa partnership ug tabang sa Iligan LGU ngadto sa lungsod sa Manticao.
“Aminado kami nga limitado ang among resources busa dakong tabang ang partnership sa ubang LGUs sama sa Iligan,” pamahayag ni Mayor Tan.
Septiyembre sa miaging tuig, nag deploy ang Iligan City Disaster Risk Reduction and Management Office (ICDRRMO) sa ilang Water Search and Rescue kon WASAR Team ug rescue boat aron motabang pagpangita sa nawala nga usa ka mananagat nga taga-Manticao.
Nag-adopt usab ang ICDRRMO og tulo ka member sa Incident Management Team sa Manticao aron makahuman sa duha ka training course sa Incident Command System ug nagpahulam sa mga kagamitan para sa training sa DRRMO Manticao. (LGU Manticao/PIA-10 Misamis Oriental)
