BACOLOD CITY (PIA) — Ang ginpabaskog nga information campaign kag agresibo nga pagpatuman sang layi sa mga dalanon ang pila sa mga tikang nga ginbuhat sang Negros Occidental Police Provincial Office (NOCPPO) nga nagresulta sa pagnubo sa 25 porsyento sang mga aksidente sang nagligad nga tuig.
Halin sa 1,216 sang 2023, nagnubo sa 906 ang kaso sang mga aksidente sa kalsada sa Negros Occidental sang nagligad nga tuig.
“Mahimo nga ini tungod sa mas ginpabaskog nga pagpatuman sang mga kasuguan kag ordinansa sa trapiko, kasubong man ang information operation sa road safety,” suno kay NOCPPO provincial director PCol. Rainerio De Chavez.
Para sa abogado nga si Cindy Ballesteros nga kada-semana nagabiyahe sa national highway pakadto sa trabaho, iya naobserbagan ang pagnubo sang mga aksidente sa dalan sang nagligad nga tuig.
“Kon ipaanggid sang nagligad, nga halos kada tion nga nagabyahe ako sang malawig nga distansya pakadto sa ubra, makita ko nga mas nag diyutay na ang mga aksidente sa dalanon apang ara sa gihapon ang mahinay nga lakat sang trapiko kag ang mga pulis ara man nagabantay sa mga highway ilabi na sa lugar nga madamo sang mga panimalay,” siling ni Ballesteros.
Sa datos sang NOCPPO, nagnaba ang insidente sang reckless imprudence resulting in physical injury halin 517 tubtob 366, kag sang reckless imprudence resulting in damage to property halin 552 tubtob 393.
Sa isa ka press conference, ginpabutyag man ni NOCPPO Public Information Officer PCapt. Judesses Catalogo ang importansya sang ila kampanya batok sa anti-drunk driving para malikawan ang disgrasya.
“Sang nagligad nga tuig, ang intensification sang aton nga information campaign about sa paglikaw sa pagdrive sang mga salakyan ukon motorsiklo (samtang) may impluwensya sang alcohol. Isa ina sa gina-attribute naton (sa pagnubo sang mga aksidente sa dalanon) ang information campaign nga actually nagatudok sa paminsaron sang aton mga driver,” suno sa iya.
Dugang pa ni Catalogo, ang presensya sang mga kapulisan sa mga pampubliko nga lugar ang isa sa mga ginalantaw nga rason sa pagnubo sang mga aksidente sa dalanon.
Ang regular nga deployment sang kapulisan sa mga lugar nga masami ginatunaan sang aksidente nagaserbe nga pahanumdom sa mga motorista nga mag-doble halong sa pagmaneho paagi sa pagsunod sa speed limit kag mga pagsulundan sa kalsada, pati man ang pagsiguro nga sa kondisyon ang ila salakyan sa pagbyahe.
Ginhambal man sang opisyal nga kon may mga naka-deploy nga pulis sa nagkalainlain nga mga lugar, ilabi na sa mga lugar nga accident-prone kag sa mga dalagku nga dalanon, malikawan ang pareho nga aksidente kag kriminalidad.
Ang NOCPPO padayon nga nagapakig-angot sa nagkalain-lain nga talatapan sang gobyerno kaangay sang Highway Patrol Group (HPG) kag Land Transportation Office (LTO) agud mas masiguro ang hilway nga mga dalanon para sa tanan.
Nagpahanumdom man ang kapulisan sa mga pumuluyo nga mangin alerto kag mabinantayon sa tanan nga tion agud malikawan ang mga aksidente kag mabiktima sang kriminalidad. (AGP/BPS/Intern MRVA/PIA Negros Occidental)
