TAGBILARAN CITY, Bohol (PIA) — Mokabat sa 284 ka Bol-anong mag-uuma ang makadawat og labing taas nga P100,000 matag ektarya nga hinabang gikan sa Rice Contract Farming Program sa National Irrigation Administration (NIA) karong sunod nga tingtanum.
Niadtong Mayo 30 ug 31, 20 ka Irrigators Associations (IAs) ang milagda sa Memorandum of Agreement (MOA) sa NIA Capayas IS Office sa lungsod sa Ubay ug sa NIA Malinao IS Office sa lungsod sa Pilar, aron makaapil sa Contract Farming Program.
Kini nga mga mag-uuma mga benepisyaryo sa Bohol Integrated Irrigation System sa NIA Rehiyon 7 (Ubay, Pilar, San Miguel, ug Talibon), ug sa Cagawasan Communal Irrigation System.
Ubos niini nga programa, ang NIA mohatag og katumbas sa P50,000 kada ektarya alang sa karon nga tingtanum sa dagway sa farm inputs, sama sa mga liso, abono, pamatay-dangan, fungicides, soil ameliorant, ug cash.
Ang mga mag-uuma usab maoy responsable sa produksyon sa humay, lakip na ang pag-andam sa yuta, pagmintinar sa tanum, pag-ani, ug uban pang mga kalihokan sa pagpanguma.
Sa higayon nga anihon na ang humay, bayran sa NIA ang mga mag-uuma og kwarta, katumbas sa aktuwal nga produksyon sa humay, P50,000 nga maximum base sa gi-target nga 5 metriko tonelada nga presko nga humay kada ektarya.
Dugang pa, kung ang mga mag-uuma maka-ani og labaw sa target nga 5 metriko tonelada matag ektarya, mahimo nilang tipigan o ibaligya ang sobra nga bugas alang sa dugang kita.
Kini nga kasabutan sa produksiyon sa agrikultura nagtanyag sa mga mag-uuma og akses sa mga input sa pagpanguma, garantiya nga merkado, ug lig-on nga presyo sa ilang mga produkto, nga nagpakunhod sa mga risgo nga dala sa pag-usab-usab nga presyo sa merkado.
Ang inisyatibo, nga may temang “Seguridad sa Pagkain, Tungo sa Bagong Pilipinas,” nagtumong sa pagpalambo sa ani sa agrikultura, pagsiguro sa ganansya sa mga mag-uuma, ug pagtampo sa kinatibuk-ang kalamboan sa sektor sa agrikultura. (ECB/PIA7 Bohol)
