SYUDAD SANG ILOILO (PIA) — Ginhingyo ni Presidente Ferdinand R. Marcos Jr. sa mga lokal nga punong ehekutibo sa Iloilo nga magkoordinar sa mga ahensya sang gobyerno sa pagpasanyog sang mga proyekto infrastruktura sa probinsya.
Sa iya paghambal sa sinapol sang Regional Development Council (RDC) sa syudad sang Iloilo sang Huwebes, ginpahayag ni Presidente Marcos nga ang mga punong ehekutibo nagadala sang importante nga bahin sa pagpaayo sang probinsya kag kaayuhan sang mga nasakupan.
“Nobody is more expert in your area than the governor and mayors, and so, we always consider your inputs to be very, very valuable,” pahayag ni Presidente Marcos.
Gindugang man sini nga “Do not be hesitant if there’s something else that you want to bring up, if there is a problem or if you think there is a good idea that we can develop, iparating ninyo sa amin and we will look into it.”
Ginsaysay man ni Presidente Marcos ang progreso sang mga mayor nga proyekto sa infrastruktura sa Kabisay-an Nakatundan kalakip na ang rehabilitasyon kag pagpaayo sang Boracay Circumferential Road kag ang Jalaur River Multipurpose Project Stage III.
Nagbaton man ini sang updates natuhoy sa Panay-Guimaras-Negros Island Bridge Project, ang Panay Railway System, ang Boracay Bridge Project kag ang Road Widening sang Jaime Cardinal Sin Avenue sa Aklan.
Ginpresentar man sang lokal nga punong ehekutibo ang updates kaangut sa Bacolod-Negros Occidental Economic Highway, ang Panay East-West Road, ang Panay River Basin Integrated Development Project kag ang Iloilo-Capiz-Aklan Expressway.
“This has been very useful for us because it is very important for us at the national level to hear from the locals. I am always reminding everyone that you must do all of these big projects, small projects, whatever it is basta’t national initiative,” pahayag sang Presidente.
Liwat nga ginpahayag sang Presidente ang iya suporta sa tanan nga prayoridad nga mga proyekto sa Kabisay-an Nakatundan. (AAL/LAF/PIA6-Iloilo/ PND)
