Ginpahayag ni PCO undersecretary Claire Castro sa isa ka press briefing nga dako ang mabulig sang exemption sang Pilipinas sa pag-freeze sang foreign aid sang Estados Unidos. (PND)
SYUDAD SANG ILOILO (PIA) – Nagpabutyag sang kalipay ang Pilipinas matapos ginkumpirmar sang Department of Foreign Affairs (DFA) nga wala malakip sa mga temporary nga pauntaton nga global foreign aid sang Estados Unidos ang security aid nga ila ginahatag sa pungsod.
“Natutuwa po tayo na nagkaroon nga po ng direktiba si US President (Donald) Trump na 90 days magkakaroon ng ipi-freeze ang foreign aid,” pahayag ni Palace Press Officer kag Presidential Communications Office (PCO) undersecretary Atty. Claire Castro sa press briefing sa Malacañang.
“Kung nagkaroon po tayo ng exemption at nagkaroon po tayo at ibibigay po at iri-release ang 500 million dollars foreign financing sa atin, ito po ay napakalaking bagay at nagpapasalamat po tayo sa suporta na iyan,” dugang pa sini.
Suno kay Castro, ang exemption nagapakita sang padayon nga suporta sang US sa pagpabaskog sang depensa sang pungsod.
Ginpahayag man sini nga nagapadayon ang modernisasyon sang Armed Forces of the Philippines (AFP), kun sa diin importante kag dako ang mabulig sang suporta pinansyal sang US.
Sang Pebrero 24, 2025, ginkumpirmar man sang DFA nga gin-exempt sang US ang ila security assistance sa Pilipinas kag ginpabalo ang Manila nga gina-waive nila ang porsyon sang ila foreign military financing.
Sang nagligad nga tuig, gin-anunsyo sang US ang paghatag sang bulig pinansyal nga nagabalor sang $500 million para sa modernisasyon sang AFP kag para sa Philippine Coast Guard (PCG).
Kun madumduman, ginsuspender sang US State Department ang halos tanan nga foreign assistance sa bug-os nga kalibutan sang nagligad nga bulan matapos nga nagpaguwa si Presidente Donald Trump sang executive order nga pauntaton ini sa sulod sang 90 ka adlaw. (AAL/JNH/PIA Iloilo/PND)
