CAMIGUIN (PIA) — Ang lokal nga kagamhanan sa Mambajao nag-imbitar sa mga residente ug mga bisita nga magparehistro para sa Camiguin Trail Race 2025, nga ipahigayon karong Hulyo 12-13.
Ang 24-oras nga lumba adunay tulo ka kategoriya sa gilay-on—70km, 25km, ug 10km—nga gilaraw para sa mga atleta ug bag-ong mga runner nga gustong masinati ang mga trail sa kabukiran sa Camiguin. Magsugod ang lumba sa alas 10:00 sa gabii sa Hulyo 12, ug matapos sa alas 8:00 sa gabii sa sunod nga adlaw.
“Dako japun ni siya nga challenge sa runners, but rest assured, kami sa munisipyo sa Mambajao, uban ang atong stakeholders, among mapakita sa ila unsa’y kapatsada ba gyud nga ruta nga naa sa taas sa Mambajao,” matod ni LGU Mambajao Sports Coordinator Gilbert Grado atol sa Lambo Dyes nga programa sa radyo.
Alang sa preparasyon sa lumba, gisiguro sa mga tig-organisa ang kaluwasan sa matag ruta sa tanang kategoriya, diin ilang gipunting ang maayong pagbutang sa mga istasyon sa nagkalain-laing lugar.
Ang mga istasyon gituyo aron mohatag og tubig, medikal nga tabang, ug direksyon para sa mga partisipante.
“Nitabang sa ato ang komunidad, labi na pag-identify kung asa ta muagi, asa ang tsada nga lugar nga diin atong bisita ma-feel gyud nila nga ang panahon nga niapil sila sa atong padagan,” dugang ni Grado.
Gipasiugda usab niya ang kaayohan sa sports tourism sa probinsya. “Aside sa pag-invite og mga turista, makatabang pud ta sa atong Sports Development Program nga adunay impact sa tong kabatan-onan,” iyang giingon.
Niaging tuig, usa sa mga partisipante nga si Carlos Peñaloza miingon nga “pure magic” ang iyang kasinatian sa Camiguin Trail Race.
“The trail was a slippery challenge, but conquering those muddy slopes and breathtaking views made every drop of sweat worth it! I’m feeling accomplished and grateful for this unforgettable experience,” iyang gipahayag.
Pagkahuman sa lumba, ang mga partisipante makadawat ug finisher’s medal ug shirt. Ang mananaug sa matag kategoriya makadawat usab ug cash prize ug tropeyo.
Para sa mga interesado nga moapil, mamahimong mubisita sa LGU Mambajao Sports o sa The Vertical to Sky Sports Management para sa dugang nga kasayuran kabahin sa Camiguin Trail Race 2025. (RTP, HSGA/PIA-10)
