TAGBILARAN CITY, Bohol (PIA) — Sugdan na sa Philippine Statistics Authority (PSA) ang mandatory census sa tibuok populasyon sa nasod sunod semana.
Dinhi kolektahon na usab sa PSA ang mga datos ug impormasyon kabahin sa populasyon ug alang sa Community-Based Monitoring System (CBMS) sa ahensya.
Alang sa census sa populasyon, ang gidaghanon sa mga miyembro sa panimalay ilista aron ma-update ang ihap sa populasyon sa nasud.
Ug tungod niini, gikinahanglan nga makuha sa mga enumerators sa PSA ang tukma o saktong impormasyon.
Ato usab nga gikinahanglang mo-kooperar ug mosalmot ang publiko kay kon dili, mahimo silang multahan nga naglakip sa usa ka tuig nga pagkabilanggo ug silot nga moabot ngadto sa P100,000, segun sa PSA.
Sa bahin sa CBMS, kolektahon ang mga datos nga magamit sa pagplano ug pagpatuman sa mga proyekto sa gobyerno sa lokal nga lebel.
Nagkinahanglan kini og pagtugot sa mga lungsoranon sa pag-apil.
Tungod niini, si National Statistician Dennis Mapa mi-awhag sa publiko sa pag-apil ug pagsulti lang sa saktong impormasyon nga pangayuon sa mga enumerator.
Aron masiguro ang usa ka lehitimong census, ang mga enumerator magsul-ob og uniporme nga adunay logo sa PSA ug adunay katugbang nga mga ID.
Molanat lang og 45 minutos ang interbyu, ug pangutan-on nila ang pangalan, edad, lugar ug klase sa trabaho sa matag panimalay.
Gipasalig usab ni Mapa nga ang pagpangutana ug ang tibuok census motuman sa mga probisyon sa Data Privacy Act.
Ang nasudnong kagamhanan nigahin og P5.2 bilyones nga pondo alang niini diin moabot sa 70,000 ka mga enumerators ang ipakatap aron bisitahon ang gibana-bana nga 27 milyones ka mga panimalay gikan sa Hulyo 15 hangtod Sept. 15, 2024. (ECB/PIA7-Bohol)
