SYUDAD SANG ILOILO (PIA) — Ginhatagan sang bulig pinansyal ang 1,668 nga mga mangungoma, mangingisda, kag mga pamilya sa bahin sang Dumangas sa idalom sang Presidential Assistance to Farmers, Fisherfolk, and Families (PAFFF).
Ginpangunahan ni Gov. Arthur Defensor Jr. ang distribusyon kaupod ang mga lokal nga opisyal sa kahiwatan sang Haw-as Festival sang banwa.
Nakabaton sang P10,000 ang kada benepisyaryo kag ini ang makabulig sa pagrekober sa tuman nga halit dulot sang El Niño.
Naglab-ot sa P12.650 milyon ang pondo gikan sa PAFFF nga ginturn-over ni Presidente Ferdinand Marcos Jr. kay Gov. Defensor sadtong Hunyo 27, 2024 sa probinsya sang Antique.
Samtang, naghatag sang dugang nga P1 milyon si USWAG Partylist Rep. Jojo Ang kag P2.930 milyon naman nga pondo gikan kay Fourth District Rep. Ferjenel Biron.
Ginpat-od ni Defensor nga ang agrikultura ang isa sa mga prayoridad nga sektor sang gobyerno probinsyal kag ginkilala nga madamo sa mga Ilonggo ang nagadepende sa pagpanguma kag pagpangisda bilang nagapanguna nga palangabuhian.
Dugang pa, nagpa-in ang gobyerno probinsyal sang dako nga pundo para sa mga programa sa agrikultura kasubong sang hybrid rice, irigasyon, kag rice processing agud malambot ang target nga six metric tons kada ektarya nga produksyon sang agrikultura sa probinsya.
“Ubuson naton ang aton pwersa para makalab-ot kita sa anum ka tonelada kada hektarya. Indi ini mahapos pero mas maayo nga may ginatulok kita nga direksyon,” pahayag ni Defensor.
Kabahin man ini sa development thrust ni Defensor angot sa MoRProGRes Iloilo nga may tinutuyo nga mapadako aang produksyon sang agrikultura kag mapasanyog ang industriya sang agri-tourism.
Ginalantaw man sang gobyerno probinsyal ang pagbalhin sa inland aquaculture bilang isa ka alternatibo nga ginahalinan sang protina magluwas sa karne sang baboy.
Madumduman nga ang Provincial Agriculture Office ang nagpanagtag man sang bulig para sa 3,949 nga mga mangungoma kag mangingisda sa idalom sang PAFFF. (AAL/LMLE/PIA Iloilo)
