SYUDAD SANG ILOILO (PIA) — Gindugangan sang tatlo ka pilo sang gobyerno ang supply sang P29 per kilo nga bugas para sa mga imol kag vulnerable nga mga puluy-an sa mga Kadiwa stores, suno sa opisyal sang National Food Authority (NFA).
Sa press briefing sa Malakanyang sang Abril 15, ginsiling ni NFA Administrator Larry Lacson nga si Agriculture Secretary Francisco Tiu Laurel Jr. sining damlag lang nagmando nga dugangan ang availability sang P29/kilo sang bugas humalin sa 10 kilos tubtub 30 kilos maximum nga mahimo mabakal sang tagsa ka imol kag vulnerable nga puluy-an sa tagsa ka bulan.
Ginpasangkad man sang Department of Agriculture (DA) ang malab-utan sang iya P29/kilo rice program sa pagdugang sang madamo pa nga Kadiwa store sa bug-os nga pungsod, pahayag ni Lacson.
Ginlunsar sang DA sang nagligad nga tuig ang large-scale trial sang P29 rice program, isa ka inisyatibo nga ginpangunahan ni Presidente Ferdinand R. Marcos Jr. nagatuyo sa paghatag sang mataas nga kalidad sang bugas sa P29 per kilo sa subong kadamo sa 6.9 milyon “vulnerable households,” nga nagarepresentar kapin sa 35 milyon ka mga Filipino.
Kabilugan nga 10 ka mga Kadiwa store sa Metro Manila kag Bulacan nagsugod na sa pagbaligya sang sining manubo nga presyo nga bugas sa trial program kag sa karon naga-expand sa iban nga mga Kadiwa outlet.
Ginakuha ining P29 per kilo nga bugas halin sa ageing stocks sang NFA nga igabaligya sa mga vulnerable nga puluy-an nga ginalaragway sang DA nga mga benepisyaryo sang Pantawid Pamilyang Pilipino Program (4Ps) sang gobyerno, solo parents, senior citizens, persons with disabilities kag indigenous people.
Ang 4Ps program isa ka human development measure sang panguluhang nasyunal nga nagahatag sang conditional cash grants sa mga pinaka-imol nga imol, mapaayo ang ikaayong lawas, nutrisyon kag edukasyon sang mga kabataan nagapangidaron 0-18, pahayag sang Department of Social Welfare and Development (DSWD).
Samtang ang gobyerno nagsugod man sa pagbaligya sang P33 nga bugas sa mga Kadiwa store sa resettlement sites para sa mga benepisyaryo sang public housing bilang kabahin sang programa sang gobyerno nga mapat-ud ang seguridad sa pagkaon.
Nagapahamtang na ang gobyerno sang mga Kadiwa store nga nagabaligya P33 per kilo sang bugas sa housing sites sang National Housing Authority (NHA) sumugod sini nga Abril, pahayag ni General Manager Joeben Tai sa isa ka statement.
Suno kay Tai madamo pa nga mga Kadiwa store ang magabukas sa nagkalain-lain nga mga lugar halin sini nga bulan tubtub sa Mayo 2025. (AAL/LAF/PIA Iloilo)
