TAGBILARAN CITY, Bohol (PIA) – Usa ka ambisyoso nga proyekto nga ipatuman unta ngadto sa mga kalungsuran nga adunay mga napundo nga tubig, ang karon gipatun-an, dungan usab sa kasibut sa Administrasyon ni Gob Erico Aristotle Aumentado ug Bise Gob Tita Baja nga ugmaron pa ang dugang tinubdan sa preskong isda.
Taliwala sa nagnihit nga suplay ug nagmahal nga presyo, ang pag-ugkat sa mga nagkadaiyang local nga tinubdan sa isda nahimo nga prayoridad sa kagamhanan ang aquaculture sa tilapia gamit ang Tilapia Sex Reversal Project (TSRP).
Ang TSRP namugna diha nga namatikdan nga kon ang tilapia, sagulon ang babaye ug lalaki, mas dali sila nga mohamtong ug mas modaghan tungod kay mosanay, kay sa dili mangdagko, butang nga gilikayan tungod sa menos nga halin sa gagmay nga tilapia.
Mas dagko usab ang laki nga tilapia kay mas paspas kini motubo, ug mas maayo nga maoy patambokon.
Aron modaghan ang mapatambok nga lalaki nga tilapia, ang pagpausab sa sex sa tilapia maoy labing paspas nga paagi.
Namatikdan nga ang bag-o nga pusa nga itlog sa tilapia, walay gonads, o parte sa lawas nga maoy makabuot kon ang isda inig ka dako, mahimong babaye o lalaki.
Tungod niini, ang mga eksperto misuway og butang og androgens sa mga piso sa tilapia aron mamahimo kini nga lalaki nga tilapia inig ka dako niini.
Kini karon nga mga lalaki nga tilapia nga makuha gikan sa sex reversal, mao nay ipang-apud-apod sa mga kalungsuran nga buot mosagop sa tilapyahan nga anaa sa gipalutaw nga mga High Density Polyethylene nga mga tangkal sa isda.
Kahinumduman nga una nga nga gilaraw sa Bohol nga makigsabut sa Bureau of Fisheries and Aquatic Resources (BFAR) 7, sa National Irrigation Administration ug sa mga kalungsuran, aron kasugdan na ang pagpamuhi ug pagpatambok sa mga tilapia nga lalaki, gamit ang sex reversal technology. (RAHC/PIA Bohol)
