Mas duro nga mga kooperatiba magabaton kang bayad sa SSS

SAN JOSE, Antique (PIA) — Mas duro ron ang numero kang mga kooperatiba sa dya nga probinsya nga magabaton kang bayad para sa Social Security System (SSS).

Halin sa lima lang ka mga multi-purpose cooperative (MPC), magasaka ron sa pito ang mga kooperatiba nga magabaton kang bayad para sa SSS contributions kang andang mga miyembro.

Matandaan nga ang SSS may lima ka partner cooperatives sa mga banwa kang Dao, Barbaza, Patnongon, Pandan, kag Libertad, pero sa tulad ang madugangan kang mga kooperatiba sa banwa kang Belison kag Hamtic.

Ginpangunahan ni SSS President kag Chief Executive Officer (CEO) Rolando Ledesma Macasaet ang pagpirma kang sangka Memorandum of Agreement (MOA) sa tunga kang andang ahensya kag mga kooperatiba kang Belison kag Hamtic.

Ang MOA nagapahanugot sa mga kooperatiba nga magbaton kang bayad sa andang kontribusyon sa SSS kag magproseso kang SSS online transaction.

Si SSS President kag Chief Executive Officer Rolando Ledesma Macasaet kag iban pa nga opisyales kang SSS sa sangka press briefing. (Photo: PIA Antique)

Hambal ni Macasaet, importante ang partnership kang SSS sa mga kooperatiba sa pagsiguro kang mas aktibo nga mga miyembro, pati man sa pagsiguro kang pagbayad kang kontribusyon kag loans sa insakto nga oras.

Sa bahin naman ni Susie Nermal nga amo ang chairperson kang Belison MPC, ang dyang lihok sa tunga kang SSS kag mga kooperatiba magapahulas sa transaksyon kang mga miyembro.

Dugang pa sa pagkolekta kang mga bayad, ginapahanugutan man ang mga partner cooperatives nga magproseso kang membership, My.SSS registrations, disbursement account enrollment, kag online submission kang aplikasyon sa benefits kag loans.

Sa baylo, may P6.00 nga parte ang mga kooperatiba halin sa SSS sa kada aprubado nga transaksyon.

Paagi sa dyang inisyatibo, mas ginpalapad man kang SSS ang kahigayunan nga magpamiyembro kag makaagom kang social security ang mas duro nga mga Pilipino kaangay kang mangunguma kag manugpangisda. (AGP/BPS/PIA Antique)

In other News
Skip to content