SYUDAD SANG ILOILO (PIA) – Ara sa 35, 949 ka mga teaching personnel sang Department of Education (DepEd) sa Western Visayas ang maga-alagad kag maga-akto bilang mga kabahin sang electoral board para sa palaabuton nga May 12, 2025 national and local elections.
Ini ang ginpahayag ni DepEd-6 information officer Hernani Escullar Jr. sa isa ka press conference nga ginhiwat sang Philippine Information Agency (PIA)-Iloilo Information Center sang Abril 23.
Dugang pa ni Escullar nga ang nasambit nga mga manunudlo ang iga-deploy sa 7,337 ka classrooms nga magaserbe bilang polling precincts sa 2,801 tanan ka eskwelahan sa idalum sang 21 ka schools division sa bilog nga rehiyon.
Magluwas diri, may ara man sang dugang nga 2, 875 ka non-teaching personnel ang maga-assist sa mga eskwelahan, kag 2, 217 ka iban pa nga personnel nga iga-assigned sa election task force, kag iban pa nga trabaho sa adlaw sang eleksyon.
Ginpahayag man ni Escullar nga ang tanan nga mga teaching personnel nga i-deploy para sa eleksyon ang maga-alagad sang tampag, may integridad kag nagapabilin nga nonpartisan.
Magalunsar man sang isa ka task force ang DepEd-6 para sa pagbantay sang mga isyu kag mga kabalaka sa tion sang paghiwat sang eleksyon kag ila man ini iga-koordinar sa nagakaigo nga mga awtoridad.
Suno naman kay Iloilo Provincial Election Supervisor, Atty. Reinier Layson, tapos na ang una nga bahin sang training proper kag yara na sa subong sa last phase sang training ukon ang refreshers training.
Gin-athag ni Layson nga wala na sang mga manunudlo nga may paryente sa mga kandidato bangud nga ginpaidalom man nila ini sa isa ka verification antes pa man sila ginkuha nga mangin kabahin sang eleksyon. (AAL/JNH/PIA Iloilo)
