SYUDAD SANG ILOILO (PIA) – Naglab-ot na sa 63,672 ka indibidwal sa syudad sang Iloilo ang nabakunahan sang City Health Office kontra sa flu.
Nag-umpisa ang pagbakuna sang mga katapo sang CHO sang Nobyembre 21, kun sa diin luyag sini nga una nga mabakunahan ang mga pumuluyo nga naga edad napulo pataas.
Padayon naman ang kampanya sang CHO sa pagbakuno sang mga Ilonggo kun sa diin target sini nga mabakunahan ang 150,000 ka indibidwal sa syudad sang Iloilo.
Sa isa ka mensahe, nagpasalamat naman si Iloilo City Mayor Jerry P. Treñas kay Presidente Ferdinand Marcos Jr. kag sa Department of Health para sa suporta nga ginhatag para mabakunahan ang mga residente sang syudad.
“I extend my gratitude to President Ferdinand Marcos Jr. and the Department of Health for their support and for allocating vaccines that made this possible. Without their assistance, our flu vaccination program would not have reached this level of success,” pahayag ni Treñas.
Ginhingyo naman sang CHO, sa pagpanguna ni Dr. Anabelle Tang, ang mga pumuluyo nga magpabakuna sa mga health center sa kada distrito sang syudad.
Gin-agda man sini ang mga eskwelahan, pribado nga kompanya, kag iban pa nga mga ahensya sang gobyerno nga mag-ugyon sa kampanya sang CHO para sa mass vaccination drives.
“Let us all work together for safer workplaces, learning environments, and public spaces for everyone. Prevention is our most powerful tool in ensuring a healthy and resilient city,” dugang pa ni Treñas. (AAL/JNH/PIA Iloilo)
