SYUDAD SANG ILOILO (PIA) — Masobra sa 7,000 ka mga Pilipino humalin sa tanan nga lebel sang pagpangabuhi ang nagpasakop sa “Takbo Para sa West Philippine Sea” sa syudad sang Pasay sang Hulyo 7.
Ang mataas nga numero sang mga pumalasakop nagpakita sang suporta sang ordinaryo nga mga Fiipino para sa adbokasiya sang gobyerno sa West Philippine Sea (WPS), suno kay Philippine Coast Guard (PCG) spokesperson for WPS Commodore Jay Tarriela.
Ginlaragway ang advocacy run nga madinalag-on kag ginpahayag ni Tarriela nga ang aktibidad nagaserbe man nga morale booster para sa mga uniformed personnel sang pungsod nagikan sa PCG kag Armed Forces of the Philippines (AFP).
“The mere fact na ang mga karaniwang kababayang Pilipino natin is looking ways to support our fight in the West Philippine Sea, nakakapagpataba ng puso ito sa kasundaluhan natin dito sa Pilipinas,” pahayag ni Tarriela sa isa ka hinun-anon pagkatapos sang dalagan.
Gin-organisar ang “Takbo Para sa West Philippine Sea” sang RUNRIO Inc. kaupod ang PCG, ang National Task Force-West Philippine Sea, ang Philippine Information Agency (PIA) kag ang Presidential Communications Office (PCO).
Pagkatapos sa syudad sang Pasay, ang ikaduha nga leg sang “Takbo Para sa West Philippine Sea” ang pagahiwaton sa Cebu City sa Agosto 11. Ang Cagayan de Oro magapanagbalay sang ikatatlo nga leg sang dalagan sa Septyembre 8.
“Our intention for this activity is to [raise] awareness. Palaganapin natin lalo ang ginagawang effort ng national government sa pagtindig sa laban natin sa West Philippine Sea,” pahayag ni Tarriela sang ginpamangkot natuhoy sa kaimportante sang aktibidad.
Suno kay Tarriela ang iban nga lokal nga panguluhan ang nagaplano man nga mag-organisar sang ila kaugalingon nga bersyon sang ‘Takbo Para sa West Philippine Sea.’ Gindugang man sini nga ang tinutuyo sang mga LGU “is already a positive sign” nga ang Pilipinas naga-isa para sa WPS.
Sa pag-atubang sa mga pagpanghangkat sa WPS, ginsiling ni Tarriela nga ang publiko dapat upod nga magtrabaho sa gobyerno sa idalum sang liderato ni Presidente Ferdinand R. Marcos Jr.
Gindugang sini nga ang Pilipinas magapadayon sa pagpangapin sang iya mga teritoryo. (AAL/LAF/PIA6-Iloilo/PND)
