SYUDAD SANG ILOILO (PIA) – Padayon ang kampanya sang Iloilo City government batok sa rabies kun sa diin ara sa 753 ka mga kuring kag ido sa City Proper district ang nabakunahan kontra rabies sa nauna nga semana sang Marso 2025.
Humalin Marso 5 tubtob 7, ginpasangkad sang Office of the City Veterinarian (OCV) ang serbisyo sa anum ka barangay kun sa diin 90 ka mga kasapatan ang nabakunahan sa General Hughes, 78 naman sa Monica-Blumentritt, Zamora-Melliza (98), Sto. Rosario-Duran (81), Concepcion (181), kag Veteran’s Village (225).
“Rabies is a major public health concern. With the guidance of Mayor Jerry P. Treñas, we engage the public with our comprehensive rabies program, which includes rabies vaccination, a spaying and neutering program, and information and education campaigns targeting pet owners and school children,” siling ni OCV head Dr. Fernando Abulencia.
Ang mga pagbisita sa komunidad sang OCV agud mangbakuna sang mga kasapatan ang nagasanto sa pangako sang lokal nga panguluhan sang Iloilo City sa pagdumala, kon indi man pagtapna, sang mga kaso sang rabies sa syudad.
Ini ang kabahin man sang Rabies Awareness Month nga may tema, “Rabies-free na pusa’t aso, upod ng pamilyang Pilipino.”
Naghatag man sang dugang nga animal rabies vaccines kag iban pa nga supplies ang Department of Agriculture (DA)-6.
“Ang iban (pet owners) naga rason lang nga wala sila kabalo. But as a responsible pet owner, dapat accountable ka,” dugang ni Abulencia.
Mahimo naman nga maka-avail ang mga walk-in clients sang libre nga rabies vaccination sa OCV, nga nahamtang sa sulod sang Motorpool Compound, Delgado Street, Lunes tubtob Biyernes, halin alas 8:00 sang aga tubtob alas 5:00 sang hapon
Ginapabaskog man sang OCV ang ila monitoring kag surveillance sa tion nga may mga suspetsado nga kaso sang rabies sa komunidiad.
“Ang rabies kasi hindi sya seasonal; it can be attibuted to vaccination failure since the positive cases are unvaccinated pets. So pag may rabies suspect na, gina-secure na daan naton kag gina-inform sila kung ano ang mga dapat ubrahon,” siling ni Abulencia. (AAL/JNH/PIA Iloilo kalakip ang mga balita gikan sa Iloilo City PIO)
