SYUDAD SANG ILOILO (PIA) — Kapin sa 6,262 ka mga benepisyaryo sang agraryong reporma (ARBs) nagikan sa probinsya sang Iloilo kag Guimaras ang nagbaton sang ila titulo sang duta kag Certificates of Condonation with Release of Mortgage (CoCRoM) nagikan sa Department of Agrarian Reform (DAR).
Ginpangunahan ni DAR Undersecretary Jesry Palmares ang pagpanagtag sang titulo sang duta kag CoCRoM sa mga ARBs sa Iloilo Sports Complex sa syudad sang Iloilo sang Disyembre 21, 2024.
Sa kabilugan nga numero sang mga ARBs kapin sa 351 ang nagbaton sang ila titulo nga nagasakop sang 473.9721 ektaryas para sa Newlands kag 710 ka mga benepisyaryo ang nagbaton sang electronic titles (e-titles) nga nagasakop sang 879.98 ektaryas sa idalum sang Support to Parcelization of Lands for Individual Titling (SPLIT) Project sang ahensya.
Nabaton man sang 5,201 ka mga benepisyaryo ang ila CoCRoM sa amo nga kahiwatan nga naghilway sa ila sa ila utang sa Land Bank of the Philippines nga nagpat-ud sang ila bug-os nga claim sa duta nga gin-award sa ila. Ang ining mga CoCRoM ang may kabilugan nga balor nga P314,661,860.29 nagalakip sang total condoned amount sa Iloilo nga nagalab-ot sa P274,622,168.08 kag Guimaras nga may P40,039,692.21 kag nagasakop sang kabilugan nga 5,465.1244 ektaryas.
Sa iya mensahe, ginsaysay ni Palmares ang kabudlay kag kalawig sa pagproseso sang titulo kag CoCRoM agud lamang ini makalab-ot sa mga benepisyaryo kag sa ila pamilya kag mapanubli sang masunod nga henerasyon.
“Kita tanan tanan nagapangabudlay ka dya, kung makaptan nyo don ang inyo CoCRoM nagapatimaan day a nga kamo ya lehitimo nga tag-iya kang inyo lupa,” pahayag ni Palmares.
Isa ka nagapanguna nga probisyon ang distribusyon sang CoCRoM sa idalum sang RA 11953 ukon ang New Agrarian Emancipation Act nga ginlagdaan ni Presidente Ferdinand R. Marcos, Jr. sang Hulyo 7, 2023, nga nagatuyo i-condone ang wala mabayaran nga utang sang mga ARB kag maga-empower sa ila nga lubos panag-iyahan kag gamiton ang duta nga gina-uma agud mapaayo ang ila kalidad sang pagpangabuhi.
Gindugang man ni Palmares nga isa sa mga prayoridad sang ahensya sa masunod nga tuig amo ang pag-organisar sang madamo pa nga mga organisasyon sang benepisyaryong agraryong pangreporma agud madamo pa nga mangunguma ang makabaton sang mga support services.
“Gani sa masunod nga tuig ginprayoridad sang aton Secretary Condrado Estrella sa pagpahanugot ni Presidente Bongbong Marcos, maka-organisar kang tanan nga mga organisasyon dugangan, kung baga, kung may 850 ka agrarian reform beneficiaries organization dugangan naton, himuon naton diya sa Iloilo, doble, para kung ma-organisar kamo ya pagpatigayon kang national government, kaimaw ya Department of Agriculture, kaimaw ya Department of Environment and Natural Resources, makabulig ka ninyo suporta sa inyo paagi sa abono, paagi sa farm machineries and equipment, paagi tanan nga pangkinahanglanon para sa pagpanguma,” pahayag ni Palmares.
Gintambungan ang pagpanagtag sang titulo kag CoCRoM nanday Cavite 2nd district Representative Lani Revilla nga nagtiglawas sa iya bana nga si Senador Ramon “Bong” Revilla, Iloilo fourth district Representative Ferjenel Biron, Gobernador Arthur Defensor, Jr., Anilao Mayor Nathalie Ann Debuque, DAR Asst. Secretary Quintin Magsico, DAR 6 Regional Director Leomides Villareal kag Asst. Regional Director Lucrecia Taberna. (AAL/LAF/PIA6-Iloilo)
