Masustansyang pagkaon mapalit sa ‘Tabo sa Nutrisyon’ sa Kapitolyo

DUMAGUETE CITY, Negros Oriental (PIA) — Gibuksan sa Kagamhanang Probinsiyal sa Negros Oriental pinaagi sa Provincial Nutrition Committee (PNC) ang “Tabo sa Nutrisyon” sa may atubangan sa Kapitolyo dinhi sa dakbayan, kini nunot sa pagsaulog sa National Nutrition Month karo’ng bulan sa Hulyo.

Mapalit dinhi ang nagkadaiyang klase sa prutas, mga utanon, ug naa sab baligya’ng preskong isda ug mga pasayan.

Sumala ni provincial nutrition action officer Dr. Liland Estacion, gituyo kini sa kagamhanan, subay sa direkta ni Gov. Manuel “Chaco” Sagarbarria aron makapalit ang katawhan og mga pagkaon nga gipatubo sa organikong paagi para masiguro na kini puno sa sustansya.

“Magpadayon ‘ni siya every Monday for the month of July para ang atong mga tawo makatilaw og mga pagkaon na organic. Libre ni siya sa mga kemikal. Nag-awhag ko sa katawhan na mo-ari dire, bisita dire sa ato nga tabo,” matod ni Estacion.

Ang Tabo sa Nutrisyon usa pod ka paagi aron matabangan ang mga mag-uuma na mabaligya ang ilang ani ug mapadako ang ilang kita.

Nagtinabangay ang PNC ug ang Provincial Agriculturist Office sa pagpatapok sa nagkadaiyang farmers’ association gikan sa mga lungsod ug siyudad sa probinsiya aron makabaligya sila sa ilang mga produkto sa “Tabo sa Nutrisyon.”

Subay niini gi-awhag ni Estacion ang katawhan na likayan ang pagkaon sa fast food ug mga pagkaon na puno og “preservatives” karong Nutrition Month.

Og, tagaan og importansya ang pagkaon og mga sud-an na sakto pagkapreparar ug pagkaluto nga puno pod og sustansya aron masiguro na himsog na kalawasan, hilabi na sa mga bata.

“Ni-encourage gyud ko sa mga mama o kinsa man ang mo-prepare sa pagkaon kung unta dili kita adtong mga dinalian na pagkaon. Ari gud ta sa pagkaon na maayong pagka-prepare. Kanang bag-o pong giluto kay didto nato makuha ang mga nutrient. Kung atong pagkaon dugay ug mopalit pod ta anang dinalian na pagkaon, dili gyud siya nutritious,” dugang pa niya.

Ang pagsaulog sa Nutrition Month karon tuiga nagdala og temang: “Sa PPAN, sama-samang sa nutrisyong sapat para sa lahat.”

Tumong niini nga mapaambit sa katawhan ang Philippine Plan of Action for Nutrition (PPAN) na naglangkob sa mga istratehiya sa pagsumpo sa problema malnutrisyon sa nasud.

Abri ang “Tabo sa Nutrisyon” matag Lunes sa may atubangan sa Kapitolyo gikan alas otso sa buntag hangtod alas singko sa hapon. (RAL/PIA7-Negros Oriental)

TABO SA NUTRISYON. Gibuksan sa Provincial Nutrition Committee ang Tabo sa Nutrisyon diha sa atubangan sa Kapitolyo sa Negros Oriental, Dakbayan sa Dumaguete atol sa pagsaulog og National Nutrition Month sa Hulyo. Nagbaligya og mga utanon ug prutas ang mga nagkadaiyang farmers' associations sa lalawigan sama niining mga mag-uuma sa Sibulan, aron makatilaw ang katawhan og mga kalan-on na gipatubo sa organikong paagi. Gisugdan ang Tabo sa Nutrisyon kaniadtong Ika-1 sa Hulyo 2024. (RAL/PIA7-Negros Oriental)

ORGANIKO, PRESKO. Ang mga nagkadaiyang klase sa utanon ug prutas nga gipatubo sa organikong paagi ang gibaligya sa nagkalain-lain farmers' association sa Negros Oriental sa may "Tabo sa Nutrisyon" sa may atubangan sa Kapitolyo, dakbayan sa Dumaguete. Gisugdan ang tabo kaniadtong ika-1 sa Hulyo 2024. (RAL/PIA7-Negros Oriental)

Gi-awhag ni Provincial Nutrition Action Officer Dr. Liland Estacion ang katawhan sa Negros Oriental na suportahan ang mga mag-uuma sa lalawigan pinaagi sa pagpalit sa ilang mga produkto sa "Tabo sa Nutrisyon" matag Lunes sa may atubangan sa Kapitolyo. Gisugdan ang tabo kaniadtong ika-1 sa Hulyo 2024 nunot sa pagsaulog sa National Nutrition Month. Iya sab gi-awhag ang katawhan na mokaon og masustansyang kalan-on matag adlaw ug likayan usa ang pagkaon og dinaliang pagkaon o fast food. (RAL/PIA7-Negros Oriental)