DAVAO CITY (PIA) — Pormal nga gidawat ni Mati City Mayor Michelle Rabat ang Seal of Good Local Governance award atol sa awarding ceremony nga gipangunahan sa Department of the Interior and Local Government (DILG) kaniadtong Disyembre 14, 2023 sa Manila.
Ang Mati City lakip sa 493 ka mga awardees sa kinatibuk-ang 1,715 ka mga Local Government Units sa tibuok nasud Pilipinas.
Kaniadtong Setyembre karong tuiga 2023, ang grupo gikan sa DILG nagpahigayon og national validation aron masuta ang 10 ka key performance areas sa dakbayan, sama sa Good Financial Administration and Sustainability, Disaster Preparedness, and Social Protection and Sensitivity.
Ang lain pang key performance areas mao ang Safety, Peace, and Order, Business-Friendliness and Competitiveness, Environmental Management, Tourism, Heritage Development, Culture, and Arts Sustainable Education, Health Compliance and Responsiveness ug Youth Development.
Kini subay sa Republic Act No. 11292 o mas nailhan nga The Seal of Good Local Governance Act of 2019.
Ang matag awardee nga LGU maka dawat og P7 ka milyon.
Sa miaging tuig, gigamit sa Mati City LGU ang ilang daug sa pag patukod og covered court alang sa mga mag-uuma, ug aron usab dili mabasa ang ilang mga produkto kung mamaligya sila sa farmers market.
Tungod niini, dako ang pasalamat ni Mayor Rabat ngadto sa tanang empleyado sa Mati City LGU tungod kay nanahimo kining posible tungod sa ilang serbisyo ug kooperasyon.
Tungod sa SGLG award, mamahimong makadawat og performance-based bonus ang tanang regular nga empleyado sa Mati City LGU karong umaabot nga bulan sa Enero.
Timailhan kini nga nagapadayon ang lokal nga panggamhanan sa pagpanghatag og maayong serbisyo ngadto sa Matinians ug kini magpadayon sa umaabot pang tuig ilalom sa administrasyon ni Mayor Rabat. (ETI/PIA-XI/Mati CIO)
