TAGBILARAN CITY, Bohol (PIA) — Daghang mga institusyon ug pasilidad sa panglawas sa lalawigan sa Bohol ang giila sa ilang kamaayo sa mga programa sa New Born Screening (NBS) sa gipahigayong 2024 Local Health Systems Awards niadtong Nobyembre 22, 2024, sa Bai Hotel, syudad sa Mandaue, Cebu.
Kini naglakip sa Cong. Natalio P. Castillo Sr. Memorial Hospital, Don Emilio del Valle Memorial Hospital (DEDVMH), Francisco Dagohoy Memorial Hospital (FDMH), SanMiguel Hospital (SMH), Governor Celestino Gallares Memorial Medical Center (GCGMMC), rural health units (RHUs) sa pipila ka lungsod, ug birthing centers sa Sagbayan ug Sikatuna.
Ang mga LGU sa Balilihan, Candijay, Dagohoy, Jagna, Sevilla, ug Sikatuna gihatagan og Certificates of Recognition alang sa pagkab-ot sa Zero Open Defecation (ZOD) status.
Sa National Infection Prevention and Control Week TikTok Challenge, nakuha sa DEDVMH ang unang pwesto.
Ang Tagbilaran City Health Office giila usab nga usa sa mga best-performing users sa Electronic Logistics Management Information System (eLMIS).
Ang mga LGU sa Bohol dugang nga giila sa National Voluntary Blood Services Program, uban sa daghang mga lungsod nga nakadawat og mga pasidungog alang sa ilang mga kontribusyon.
Ang ACE Medical Center ug GCGMMC giila isip usa sa labing responsive nga pasilidad sa panglawas alang sa Central Visayas Electronic Health Referral System.
Giila usab ang DEDVMH sa pagbansay sa 1,977 ka miyembro sa panimalay sa basic life support.
Ang Bohol Provincial DOH Office giila isip Most Disaster Risk Reduction Management for Health (DRRM-H) Responsive PDOHO, nga naglangkob sa 48 sa 49 ka LGU ug 13 sa 14 ka pasilidad sa panglawas.
Ang Maribojoc giila isip labing maayong LGU sa paggamit sa electronic medical record sa lebel sa munisipyo.
Samtang ang Sagbayan, Baclayon, Talibon, Jagna, ug Candijay nominado alang sa kinatibuk-ang municipal-level health system awards, diin ang Sikatuna maoy nahimong 2nd runner-up sa rehiyon nga nakadawat og P50,000 nga cash ug tropeyo.
Ang Garcia Memorial Provincial Hospital (GMPH), nasulod sa Hall of Fame tungod sa pagkasulod sa tulo ka sunud-sunod nga tuig sa excellence sa regional health emergency management services gikan sa 2022 ngadto sa 2024.
Si Dr. Miguelito Jayoma, medical center chief sa GCGMMC, ug Dr. Cesar Tomas Lopez, kanhi provincial health officer I sa Bohol PHO, nakadawat usab sa prestihiyosong Regional Director’s Award.
Gidayeg usab ang pipila ka maayong gawi gikan sa mga LGU sa Bohol, lakip na ang libreng physical therapy services sa LGU Carmen, nga nalakip sa Top 6, ang organisasyon sa Barangay Health Emergency Response Teams gamit ang quad-cluster approach sa LGU Baclayon, ang pagpatuman sa PhilHealth Comprehensive Outpatient Benefit Package sa LGU Dauis, ang blood donation campaign “iSANgDUGO, iSANgISIDROhanon, Dugong Manggihatagon” ni LGU San Isidro, ug ang mobile clinic program sa Tagbilaran City.
Sa gipaabot nga mensahe, si PHO Officer-in-Charge Dr. Fruserma Mary Uy nihatag og gibug-aton nga ang mga kalampusan sa Bohol nagpakita sa hiniusang paningkamot sa mga LGU ug stakeholders.
Iyang gipasidunggan ang dedikasyon sa health workforce, lakip na ang mga doktor, nurse, disaster management personnel, hospital staff, ug barangay health workers (BHWs).
Matud pa niini nga ang mga pasidungog maoy mga testamento sa kakugi sa mga health workforce, ang walay kakapoy nga mga doktor, nars, DRRM-H personnel, tanang uban pang personnel sa mga ospital ug mga pasilidad sa primary care, ug ang mga BHW sa mga barangay sa tibuok lalawigan sa Bohol. (ECB/PIA7 Bohol)
