SYUDAD SANG ROXAS, Capiz (PIA) — Nangin matawhay ang mga campus sang Capiz State University sang Nobyembre 6 matapos nga ginpatuman sa mga estudyante sang unibersidad ang Mental Health Break ukon “Hamutaway Day.”
Ang Hamutaway Day ang ginasaad sa Memo Order No. 2024-11-3139 nga gin-isyu ni Dr. Efren Linan nga presidente sang CapSU agud nga maka-recharge ang mga estudyante sang ila mga kaugalingon matapos ang mga eksaminasyon kag iban pa nga academic requirements.
Ang memorandum ang naghatag man sang direktiba sa mga faculty sang CapSU nga likawan ang paghatag sang ano man nga school-related nga hilikuton antes ang Hamutaway Day.
Nahibaluan nga exempted ang CapSU Mambusao Satellite College sa banwa Mambusao bangud nakapatigayon na sang Mental Health Break ini antes pa man napagwa ang Memorandum.
Ang unibersidad ang may kapin 23,000 ka mga estudyante sa tatlo ka mga campuses kag anom ka mga satellite colleges sa probinsya.
Ang nasambit nga inisyatibo ang makaduha ka beses tagsa ka tuig nga gina-obserba tagsa ka matapos ang mid-term examination. (AGP/AAL/PIA Capiz)
