ILIGAN CITY (PIA) — Sa pagsaulog sa Safer Internet Day, gi-edukar ang mga benepisyaryo sa Pantawid Pamilyang Pilipino Program (4Ps) sa Barangay Tambacan kabahin sa responsableng paggamit sa internet ug online safety.
Ang Iligan Justice Zone (IJZ), nga gilangkuban sa lokal nga panggamhanan, Supreme Court of the Philippines, Department of Justice, ug Department of the Interior and Local Government, uban sa suporta sa Department of Information and Communications Technology (DICT) ug uban pang mga kauban nga ahensiya, maoy nanguna sa maong kalihokan aron tudluan ang mga ginikanan kabahin sa mga peligro sa internet ug unsaon pagpanalipod sa ilang mga anak batok sa hulga online.
Atol sa sesyon, nakakat-on ang mga partisipante kabahin sa Cybercrime Law, ilabina ang Seksyon 6 nga naglatid sa mga silot alang sa mga kalapasan nga gamit ang teknolohiya. Gitudlo usab ang Republic Act 10175 o ang Cybercrime Prevention Act, nga naghisgot sa mga kasagarang paglapas ug mga pamaagi sa paglikay niini.
Gitudluan sab sila sa mga pamaagi aron malikayan ang mga online scam, masabtan ang nagkalain-laing matang sa cybercrime ug ang mga sangputanan niini, ug mailhan ang hulga sa Online Sexual Abuse and Exploitation of Children (OSAEC) ug Child Sexual Abuse and Exploitation Materials, nga nagkinahanglan sa pagmatngon sa komunidad.
“Kinahanglan jud bantayan ang mga bata sa paggamit sa internet tungod kay basin naay mga dili maayong mahitabo sa ilaha. Mao nang siguraduhon nga bantayan ug i-monitor sila online,” sumala ni Jean Zalsos.
Samtang, mapasalamaton sab si Jesusa Moreno kay nakahatag kini kaniya ug kahibalo kabahin sa pag-amping online. Isip biktima sa online scam, mas nakasabot na siya karon sa kamahinungdanon sa pagmugna og disiplina sa mga anak sa ilang paggamit sa internet.
Samtang nanawagan si Mayor Frederick Siao sa kooperasyon sa komunidad aron mapanalipdan ang mga kabataan batok sa dugay nga epekto sa psychological damage nga dala sa online exploitation.
“Kinahanglan nato ang kolaborasyon sa gobyerno, mga ginikanan, magtutudlo, kapulisan, ug uban pang stakeholders aron magtinabangay para sa edukasyon ug proteksyon sa mga bata. Kami nanghangyo kaninyo, isip mga miyembro sa IJC Zone, nga kita tanan magtinabangay para sa kaayohan sa atong syudad sa Iligan,” sumala niya.
Gibutyag sab ni Siao nga kaniadto, ang Iligan usa sa top three cities sa Pilipinas nga adunay daghang kaso sa OSAEC. Apan tungod sa tinabangay nga paningkamot sa lokal nga kagamhanan, Philippine National Police, International Justice Mission, ug uban pang mga ahensiya, dako na ang kabag-ohan sa kahimtang sa syudad ug wala na kini malakip sa top 10. (LELA/PIA-10/Lanao del Norte)
