Photo courtesy of DSWD
SYUDAD SANG BACOLOD (PIA) — Madasig nga nagpalab-ot sang bulig sa mga apektado nga residente sang paglupok sang Bulkan Kanlaon sang Mayo 13 ang nagkalain-lain nga mga ahensya sang gobyerno.
Ang Department of Social Welfare and Development (DSWD) Field Office 6 hugot nga gina-monitor ang sitwasyon, ilabi na ang kahimtangan sang internally displaced persons (IDPs) sa mga evacuation centers.
May yara sang masobra 81,000 family food packs (FFPs) nga naka-standby sa DSWD Bacolod City warehouse kag iban pa nga pasilidad sa Negros Occidental nga pwede gilayon matagtag kung kinahanglan.
Ginasiguro sang DSWD nga bastante ang relief resources kag nakaplastar man ang mekanismo sa tion sang worst-case scenario.
Samtang, sa isa ka press statement, ginhambal ni Police Regional Office (PRO)-Negros Island Region (NIR) Regional Director Police Colonel Arnold Thomas Ibay nga mabaskog ang koordinasyon sang lokal nga kapulisan sa mga lokal man nga disaster risk reduction and management council (DRRMCs). Ini agud gilayon nga makapatigayon sang kinahanglan nga dugang suporta sa evacuation, relief kag security operations.
Sang Mayo 22, may narekord ang Philippine Institute of Volcanology and Seismology (Phivolcs) nga 18 ka volcanic earthquakes kag 978 tonelada sang sulfur dioxide. Nagapabilin sa Alert Level 3 ang Bulkan Kanlaon. (AGP/BPS/Negros Occidental)
