SYUDAD SANG ILOILO (PIA) — Ginalauman sang Department of Social Welfare and Development (DSWD) sa Kabisayaan Nakatungdan nga makabenepisyo ang kapin 59 ka mga panimalay sa isa ka komunidad sang Ati sa isla sang Boracay sa Malay, Aklan sa gintukod nga health station sa Kapit-Bisig Laban sa Kahirapan – Comprehensive and Integrated Delivery of Social Services ukon KALAHI-CIDSS.
Ini nga proyekto, nga ginatawag sang komunidad nga “Sapiw Durugukan” ukon ang tinaga sa Akeanon nga buot-silingon sentro sang pag-ayo, ginpundohan sang P2,374,398.30 sa idalom sang KALAHI-CIDSS Payapa at Masaganang Pamayanan (PAMANA) kag dugang nga P481,637.03 nga kontribusyon nga naghalin sa lokal nga panguluhan sang banwa sang Malay.
Opisyal nga ginhatag sa Asosasyon sang Boracay Ati Tribal Organization ukon ABATO ang 64-metro-kwadrado nga health station sa pagpanguna nanday Assistant Regional Director for Operations Katherine Joy M. Lamprea sang DSWD 6 kag Mayor Frolibar S. Bautista sang Malay.
Sa mensahe ni Lamprea, iya ginhatagan importansya ang pagtukod sang health station bilang kongkreto nga ebidensya sang pagpakigbahin sang mga katawhan sa komunidad agod nga mahatagan sabat ang ila nga mga kinahanglanon, ilabi na gid sa ikaayong-lawas.
Ang nasambit nga grupo ang mangin responsible sa pagdumala sang operasyon kag maintenance sang pasilidad.
Agod nga mangin mahapos ang pagdumala sini, magakuha ang lokal nga konseho sang Barangay Manocmanoc sang indi magkulang sa duha ka mga Barangay Health Workers (BHWs) gikan sa komunidad sugod sa tuig 2026 tion nga makumpleto sang mga ini ang pagpaidalom sa paghanas bahin sa ila mangin katungdanan sa pasilidad.
Dugang pa diri, gin-aprobahan man sang lokal nga pamunoan ang pagkuha sang isa ka utility worker nga magamintinar sa katinluon sang pasilidad.
Dugang pa, gin-aprobahan sang lokal nga panguluhan sang Malay ang pagpain sang P275,087.97 nga savings gikan sa sub-project para sa embankment kag dugang pa nga mga trabaho sa ini nga proyekto.
Nagpasalig man ang lokal nga panguluhan sang pagdesignar sang kwalipikado nga health care workers sa pasilidad kag ang dugang pa nga mga alokasyon para sa pagbakal sang mga bulong kag iban pa nga medical supplies.
Angot diri, nagpabutyag sang pagpasalamat si Maria F. Tamboon, nagapamuno sa Barangay Development Council-Technical Working Group sang Manocmanoc, para sa pagtuman sang ila dugay na nga handom.
Nahibal-an nga mabudlay para sa mga residente sang komunidad ang pag-access sang mga health care service bangod sang kalayuon kag gasto sa pamasahe nga masami nagalambot sa P150 tagsa ka pagbiyahe.
Sa karon, ang bag-o nga pasilidad makahatag na sang malapit nga serbisyo para sa mga panimalay sang mga tumandok kag kapin 3,915 pa nga mga panimalay sa Brgy. Manocmanoc sa isla. (AAL/FRG/PIA6/kalakip ang mga balita gikan sa DSWD6)
