SAN JOSE, Antique (PIA) — Naghiwat kang sangka paghanas sa environmental laws kang nagligad gid lang ang Community Environment and Natural Resources Office (CENRO)-Belison para sa mga barangay officials kang Bugasong.
Gintugruan importansya ni CENR officer kag forester nga si Louie Laud ang kinaaram kang mga opisyales sa barangay tuhoy sa environmental laws, ukon mga layi nga may kaangtanan sa palibot kag dunang manggad.
Hambal ni Laud, kinahanglan maman-an kang mga barangay official ang environmental laws bangod sanda ang marapit sa mga komunidad kag kabulig kang DENR sa pag-implementar kang mga layi.
Pira sa mga layi nga ginpakigbahin ni Laud amo ang Wildlife Act ukon Republic Act (RA) No. 9147, Chainsaw Act (RA 9175), Forestry of the Philippines, Foreshore Areas Management, kag iban pa.
Ginpresentar man sa mga nagtambong nga opisyal ang mga penalidad sa paglapas sa nasambit nga mga layi agud anda mapamaan sa mga pumuluyo kang anda tagsa ka barangay.
Gindayaw man ni Mayor John Lloyd M. Pacete kang Bugasong ang amo nga inisyatibo kang CENRO Belison, kaimaw ang Municipal Environment and Natural Resources Office (MENRO).
Ginpahanumdom man ni Pacete ang mga opisyal kang barangay nga mangin alerto kag padayunon ang mga tikang sa pagprotekta kag pagpreserba kang palibot kag duna nga manggad.
Dugang pa, nagpabutyag man si Pacete kang anang pagsuporta sa mga inisyatibo nga nagaprotekta sa provincial bird kang Antique nga “Dulungan” nga ginapatihan naga-istar sa kabukiran kang Bugasong.
Sa bahin ni MENR officer Domingo Lavega, ana ginpakigbahin ang pagsunod kang banwa kang Bugasong sa Solid Waste Management Act kag gin-agda ang tanan nga magsuporta sa pagpatuman kang amo nga layi. (AGP/YPA/PSM/BPS/PIA Antique)
