Mga kabataan sa Tibiao nagbaton kang regalo bilang kabahin ka Project Angel Tree nga ginhiwat sa anda banwa. (Laragway: PIA)
SAN JOSE, Antique (PIA) — Haros 100 ka pamilya nga may kabataan nga ginakabig nga child laborers ang nakabaton kang bulig halin sa nagkalainlain nga ahensya kang gobyerno paagi sa “Project Angel Tree” nga ginhiwat kasan-o gid lamang sa banwa kang Tibiao.
Si Philippine Army Lieutenant Colonel Arturo Balgos, Jr., nga sangka mabaskog nga nagasuporta sa mga programa para sa proteksyon kang kabataan, nagpahayag kang dedikasyon kang gobyerno sa pagtapna kang child labor.
Ana ginpangabay ang mga ginikanan nga gabayan gid ang andang kabataan kapin pa ang mga halin sa imul nga pamilya, kay sanda mas dali nga ma biktima kang mga terorista nga komunista nga makaguba kang andang seguridad, edukasyon, kag paraabuton.
Ana man ginpangabay ang mga kabataan nga magsunod sa giya kang andang mga ginikanan kag mangin responsable nga mga bata.
Ang ginhiwat nga Project Angel Tree, nga gin-organisar kag ginpangunahan kang Department of Labor and Employment (DOLE), nagatuyo nga magtugro sa mga pamilya kang kabataan kang mga serbisyo parehas kang libre nga konsultasyon medikal kag bulong, libre nga pagpagunting kang buhok, mga pagkaon, gamit sa eskwelahan, kag iban pa.
Ang Philippine Army nagdara kang mga doktor agud ipatigayon ang libre nga konsultasyon sa bulig man kang Rural Health Unit kang nasambit nga banwa.
May mga opisyal man kang Army nga nagserbe nga mga barbero kag nagtugro kang libre nga gunting sa mga kabataan.
Sa ginhiwat nga aktibidad, ginpasanyog ni DOLE Senior Labor and Employment Officer Donnabelle Baldonado ang mga inisyatibo ukon programa kang DOLE batok sa mga bata nga obrero.
Magluwas sa Project Angel Tree, nagtugro man ang DOLE kang bulig parangabuhian para sa mga pamilya nga may kabataan nga ginakabig child laborers, samtang ang iban naman nga pamilya, ginbaton nga empleyado paagi sa Tulong Pangkabuhayan Para sa Ating Disadvantaged/Displaced Workers.
Nagtugro man ka suporta ang Philippine Information Agency (PIA)- Antique Information Center sa aktibidad paagi sa sangka Hinun-anon ukon diskusyon angut sa mga importante nga probisyon kang Convention on the Rights of the Child.
Ang gobyerno probinsyal kang Antique kag ang munisipalidad kang Tibiao, paagi sa anda tagsa ka mga Public Employment Services Offices (PESO), aktibo nga nag suporta sa aktibidad, nga nagtugro kang mga pagkaon sa mga kabataan.
Ginkalipay man ni Vice Mayor Jimmy Abarientos kang Tibiao ang inisyatibo bilang paagi nga mabuligan ang mga kabataan nga makabaton kang serbisyo halin sa nagkalainlain nga ahensya, samtang si Police Major Christopher N. Candelario kang Tibiao Police Station nagpahanumdum sa mga kabataan parte sa anda responsibilidad sa anda mga ginikanan kag pamilya.
Ana man ginpangabay ang mga kabataan nga tumanon ang giya kang andang mga ginikanan nga tapuson ang pag-eskwela agud malab-ot nanda ang anda mga handum. (AGP/PSM/ PIA Antique)
