Misalmot sa Young Farmers Challenge (YFC) ang mga batan-ong Bol-anong mag-uuma ug negsyante ug kauban sa mga panel of judges, nagpahulagway atol sa ilang pagsumite sa ilang mga Business Model Canvas (BMC) nga gipahigayon ning bag-o lang sa Bohol Agricultural Promotion Center sa DA7 (B-APC sa DA7). (Hulagway sa DA7)
TAGBILARAN CITY, Bohol (PIA) — Napulo ug upat ka mga batan-on’s Bol-anon nga hilig sa panguma ug negosyo ang misalmot sa Young Farmers Challenge (YFC), samtang sila nagpasiugda ug pag-mentor sa ilang giduso nga Business Model Canvas (BMC) ngadto sa panel of judges, didto sa Bohol Agricultural Promotion Center sa DA7 (B-APC sa DA7) dili pa dugay.
Gipahigayon sa Department of Agriculture Region 7 (DA7) pinaagi sa Agribusiness and Marketing Assistance Division (AMAD), kining mga batan-on magtigi alang sa provincial level award.
Ang YFC usa ka programa sa DA nga naghatag og suporta sa mga batan-ong mag-uuma sa pagduso sa ilang mga hunahuna sa panguma ngadto sa malampuson nga mga negosyo, alang sa dugang kita ug pagtampo sa pag-uswag sa sektor sa agrikultura.
Sa duha ka adlaw nga project proposal presentations, gipakita sa mga batan-on ang ilang mga ideya ug mga inobasyon nga may kalabotan sa agri-negosyo atol sa pitching session.
Ang 14 ka partisipante mao sila si Zeus L. Gumaya Jr. (Zeus Integrated Farm), Dignity Y. Lagunay (Tinibgan Bee Reserve), Jemuel R. Dano (J and R Dano Ginger Production and Processing), Melvin Jamila (Jamila Integrated Farm), Jeanne V. Gambuta (Home-made Jen’s Special Bibingka), Rea D. Malig-on (Rea’s Egg Delights), Maria L. Abadier (Kabaw Co), James Nelson Salaguste (JN’s Backyard Farm), Angel Mae Paña (Angel’s Piggery Farm), Judy Ann L. Cimafranca (Ampingi), Zion Campo (Weave Joy), Jenifer Marie M. Gasatan (Yamazing Innovations), Jackylou B. Japos (AJ’s Aquaponics Harvest Hub), ug Ian Miles M. Borromeo (Borromeo’s Free-Range Chicken).
Ang ilang business proposals gi-evaluate sa panel of experts nga naglakip ni Dr. Anna Delza S. Barimbao, Senior Agriculturist sa DA7-AMAD, Blair Panong, Senior Trade Industry Specialist sa Department of Trade and Industry, Merlyn B. Embajador, Science Research Specialist II gikan sa Research Division sa DA7, ug Jomer M. Balag, vice-chair sa Provincial Agriculture and Fisheries Council (PAFC) Bohol.
Ang evaluation criteria mao ang entrepreneurial attributes, innovativeness sa business proposals, revenue potential, value added, ug social responsibility.
Ang matag partisipante gisusi sa abilidad sa ilang modelo sa negosyo sa pagtubag sa mga panginahanglanon sa merkado, paggamit sa modernong mga teknolohiya, pagmugna og kita, ug pagtampo sa lokal nga kalamboan sa ekonomiya. (ECB/PIA7 Bohol)
