SYUDAD SANG ILOILO (PIA) — Pinaagi sa Sustainable Livelihood Program (SLP), nagpakigbahin ang Department of Social Welfare and Development (DSWD) 6 sa 3rd Infantry Division sang Philippine Army kag lokal nga panguluhan sang Jamindan, Capiz agud maghatag sang bulig-palangabuhian para 60 ka mga Citizen Armed Force Geographical Unit (CAFGU) Civilian Active Auxiliaries (CAAs).
Ang kabug-osan sang livelihood aid nga ginhatag sang kolaborasyon naglab-ot sa P1,200,000 sandig sa report sang DSWD 6.
Ini nga mga auxiliary ang nakabase sa Agloloway kag Kalikasan patrol base nga nahamtang sa banwa sang Jamindan kag gin-organisa sa duha ka mga asosasyon nga gintawag Agloloway Troopers Association kag Kalikasan PB Association nga parehas may tag-30 ka mga katapo.
Bangod sini, ginpapahayag ni 3ID Deputy G3 Major Alenel V. Valles ang pagtukod sang kolaborasyon upod sang DSWD kag Jamindan ang nagpakita sang mas dako nga katampad sa pasanyog sang kauswagan kag kalig-unan sa komunidad paagi sa pagsuporta sa mga CAA nga ginakilala bilang mga pamakod sang seguridad sang pungsod.
Dugang pa ni Valles nga tinutuyo sang Philippine Army nga paga- ilugon nila ang ini nga inisyatibo sa bug-os nga rehiyon agod nga mabuligan man ang iban pa nga mga CAFGU CAAs kag mahatagan sila sang oportunidad para sa palangabuhian, ilabi na nga madamo sa ila ang naka-istayon sa malayo kag makahalangkat nga mga lugar.
Sa bahin sa DSWD 6, ginpahayag ni Assistant Regional Director for Operations Katherine Joy M. Lamprea nga ang paghatag sa mga CAAs sang ikasarang kag ihibalo sa pag-amlig sang ila kaugalingon pinaagi sa nasiling nga mga suporta kag mangin self-sufficient ang labing importante sang sa hatagan ang mg aini sang temporaryo lang nga bulig.
Dugang pa, nagpaabot man sang iya suporta si Jamindan Mayor Mac Artur Valdemar kag nagpahibalo sang importansya sang pagpakigbahin sang lokal nga pamunoan sa ini nga programa agod nga masiguro nga nagakaangay ang mga proyekto sa palangabuhian nga ginhatag sa lokal nga konteksto kag masustinir sa malawid nga tinion.
Pagkatapos nga mabaton ang release sang aquaculture sa isa ka programa nga ginpatigayon sa Camp General Macario B. Peralta Jr. sa Jamindan, Capiz, nakatalana nga magpaidalom sa paghanas sa tilapia grow-out production kag catfish grow out production and management ang Agloloway Troopers Association kag Kalikasan PB Association. (AAL/FRG/PIA6/lakipan sa report gikan sa DSWD6)
