SYUDAD SANG ROXAS, Capiz (PIA) — Ang mga coral sa palibot sang Napti Island sa banwa sang Panay kag Tucad Reef sa banwa sang Pilar ang makabig nga sa maayo pa nga estado base sa underwater assessment nga ginpatigayon sadtong Hunyo 4 tubtob 7 kaangot sa selabrasyon sang Environment Month.
Ang nasambit nga pagsalum nga ginpangunahan sang Sentro Para sa Ikauunlad ng Katutubong Agham at Teknolohiya (SIKAT)- Capiz sa bulig sang Capiz Provincial Environment and Natural Resources Office, Department of Environment and Natural Resources, kabanwahanan sang Panay kag Pilar, natungdan nga mga barangay, kag people’s organization ang may katuyuan nga magkolekta sing madamo nga impormasyon nahanungod sa sitwasyon kag kondisyon sang mga coral reefs sa lugar.
Ginpahayag ni Avegil Villar nga program manager sang SIKAT-Capiz nga kapin pa sa 63 ka porsyento ang coral cover sa nasalom nga lugar sa Tucad Reef kag may mga bahin pa nga ang mga coral ang sa “excellent condition.”
Ang nakolekta nga impormasyon sa undewater assessment ang magaserbe nga balasehan para sa pagtukod sang “marine protected area” nga pagadumalahan sang komunidad agud nga labi pa nga mapaayo ang coral cover kag mga pagkaon sang isda sa kadagatan.
Gindugang pa ni Villar nga ang SIKAT- Capiz ang magadihon sang data analysis, technical report, kag mga rekomendasyon kaangot sa nasambit nga hilikuton agud mapresentar sang natungdan nga mga kabanwahanan kag komunidad.
Nahibaluan nga ginpatigayon man ang kapareho nga hilikuton sa nasambit nga mga lugar sang Nobyembre 2023. (AGP/AAL/PIA Capiz)
