NEGROS OCCIDENTAL (PIA) — Nagbalik na sa ila puluy-an ang 4,000 tanan nga mga evacuees sa banwa sang La Castellana makaligad ang isa ka bulan matapos nga naglupok ang Bulkan Kanlaon sadtong Hunyo 3.
Apang may nagapabilin sa gihapon sa ila temporaryo nga puluy-an sa ila mga barangay ilabi na ang naga-istar sa sulod sang apat ka kilometro nga Permanent Danger Zone (PDZ) bangud delikado pa ang nasambit nga lugar, suno kay La Castellan a Municipal Disaster Risk Reduction Management Officer, John Asis.
Suno sa iya, ang may 1,400 tanan ka mga pamilya ang gindul-ong sang salakyan sang banwa sa ila nga mga barangay kag ginpangtagaan sang pagkaon.
Ginpaandaman sini ang mga evacuees nga hindi anay mag-inom sang tubig gikan sa ila lugar sa posilidad nga may kagaw pa dala sang abo sang asupre.
Tungod sang nasambit nga sitwasyon, ang lokal nga panguluhan ang nagadul-ong adlaw-adlaw sang 3,000 tubtob 4,000 ka litro sang matinlo nga tubig gikan sa mga trak sang Red Cross kag Office of the Civil Defense.
Nahibaluan nga hinali maglupok liwat ang bulkan, ang banwa may ara sang 15 ka trak, walo ka light vehicles, lima ka mga trak gikan sa mga planters kag maka-amot man ang probinsya sang duha ka Ceres Bus.
“Naga apelar ako sa mga taga La Castellana nga mangin handa sa tanan nga tion bangud sarang maglupok ang bulkan ano man nga oras. Gani maghanda gid sang mga kinahanglanon nga kagamitan sa isa ka “go bag” kaangay sang bayo, pagkaon, kwarta, kag iban pa, labi sa tanan magpangamuyo kita sang aton kaluwasan batok sa mga nagkalinlain nga mga kalamidad,” pahayag ni Asis.
Samtang ginpahayag ni Remue Lajo nga Public Information Officer sang La Castellana nga may 16 pa ka nga mga pamilya nga ginalakipan sang 52 ka mga indibidwal ang wala pa makapauli sa ila puluy-an bangud nasakop ini sa sulod sang PDZ kag yara lang sila sa gihapon sa covered court sang Brgy. Masulog kag Biak-na-Bato. (AAL/Lljr/PIA Negros Occidental)
