ILIGAN CITY (PIA) — Gipahigayon sa Task Force Baklas ang “Oplan Baklas” aron tangtangon ang mga ilegal nga campaign materials nga gipangbutang sa mga national highways ug ubang dili awtorisadong lugar sa syudad.
Ang operasyon natunong sa opisyal nga pagsugod sa campaign period alang sa mga lokal nga kandidato niadtong Marso 28. Gitutukan sa clearing operation ang national highway gikan sa Barangay Dalipuga hangtod sa Barangay Buruun.
Ang Task Force Baklas sa Commission on Elections (Comelec) gilangkuban sa Iligan City Police Office, 2nd Mechanized Infantry Brigade, City Engineer’s Office, City General Services Office, Department of Public Works and Highways, Bureau of Fire Protection, Department of the Interior and Local Government, ug Iligan Light and Power, Inc.
Gipasabot ni Comelec Election Officer Anna Liza Barredo nga ang matag barangay adunay designated common poster areas, ug ang tanang campaign materials nga ibutang sa kilid sa dalan o gawas sa maong mga area itandi nga ilegal ug subject for removal.
Adunay 54 ka designated common poster areas sa Iligan, kasagaran nahimutang sa sulod sa barangay hall o gymnasium sa matag barangay.
“Napahigayon na nato ang atong candidate’s briefing, diin gi-brief na mo sa Do’s and Don’ts, ug naa sab handbook nga inyong basahon, nga naglakip sa mga provisions nga among gi-cite nga importante inyong tamdan karon nga campaign period, mahimo gyud nga malinawon ug malampuson ang atong eleksyon,” sumala niya.
Gawas pa niini, atol sa bag-ohay lang nga Joint Security Coordinating Council meeting, gipadayag sa kapulisan ug kasundalohan nga nagpabiling luwas ang Iligan, nga nahisubay sa green category, nagpasabot nga walay dako nga hulga sa eleksyon. Gihisgutan usab sa maong miting ang programa nga Kontra Bigay, nga nagtinguha sa pagpugong sa vote-buying. (LELA/PIA-10/Lanao del Norte)
