SYUDAD SANG ILOILO (PIA) – Ginalauman na sang pila ka mga Ilonggo ang pagpatuman sang P20 per kilo rice program sa syudad kag probinsya sang Iloilo, kasunod sang anunsyo sang administrasyong Marcos para sa pilot rollout sini sa rehiyon sang Visayas.
Para sa madamo nga mga pumuluyo, ang inisyatibo nagahatag sang paglaum kag kinahanglanon nga bulig sa tunga sang nagataas nga presyo sang balaklon.
Ginpakigbahin ni Gerson Dalino, residente sang Guimbal, Iloilo nga nagatrabaho bilang isa ka trisikad driver sa syudad, kon paano makahatag sang daku nga bulig ang programa sa iya adlaw-adlaw nga pangabuhi.
“Malaki po ang tulong sa akin ng P20 na pambili ng bigas sa aking araw-araw na pamumuhay at saka sa extra may pambili pa ako ng ulam at pangangailangan sa aking pamumuhay araw-araw,” siling ni Dalino sa interview.
Nagpasalamat man si Jay Pelobello, isa ka security guard gikan sa Miag-ao, Iloilo sa inisyatibo sang gobyerno.
“Gapasalamat gid ako sa plano sang gobyerno nga mabaligya sang P20 per kilo nga bugas kay sa kapigaduhon subong, maka-piyan-piyan gid na sa budget sa pang adlaw-adlaw nga kinahanglanon,” pahayag ni Pelobello.
Samtang, gin-umpisahan na sang Iloilo provincial government ang preparasyon para sa rollout sang ginalauman nga P20-per-kilo rice program sa probinsya.
Naghiwat na sang isa ka pagsinapol si Gov. Arthur Defensor Jr. kaupod ang mga department head sa idalom sang Civil Defense Cluster kag ni Department of Agriculture (DA)-6 director Dennis Arpia agud maistoryahan ang mga tikang sa pagpatuman sang programa sa probinsya.
Nakatalana man nga mag-issue sang executive order si Defensor para ma-institutonalize ang rice subsidy program sa nga mga programa sang Iloilo provincial government. (AAL/JNH/PIA Iloilo)
