SYUDAD SANG ILOILO — Mas ginpabaskog ang branding sang mga pagkaon nga produkto sang mga Ilonggo nga kabahin sang micro, magagmay kag kasarangan nga mga negosyo (MSMEs) matapos nga magpakigbahin sila sa ginhiwat nga packaging and labeling seminar.
Ginpangunahan ang nasambit nga training sang Department of Science and Technology (DOST) 6 kaupod ang lokal nga panguluhan sang syudad.
Suno kay Science Research Specialist II Janene Denila, tinutuyo sang seminar nga mahanas ang 18 ka mga MSMEs sa paghatag sang dekalidad nga packaging agud mas mapataas ang lebel sang mga produkto kag pauswagon ang pagbaligya sini.
Dugang pa, ang ini nga paghanas naangot sa ginhiwat nga food safety training sang Abril.
Ang inisyal nga plano sang disenyo para sa packaging ang iga-analisar kun may mga pabag-o kag ini ang paga-aprobahan. (AAL/LMLE/PIA Iloilo)
