KALIBO, AKLAN (PIA) — Nagpili kundurayang eang ro Aklan Public Information Officers Association (APIOA) it mga bag-ong opisyales para pangunahan ru organisasyon sa masunod nga daywang dag-on sa gintigayon nga pagtilipon para sa ikadaywang kwarter sa Aklan Sangguniang Panlalawigan Conference Room, Capitol Grounds, Kalibo.
Ro hepe it Municipal Disaster Risk Reduction Management Office ag Information Officer it Gobyernong Lokal it Nabas nga si Reynard M. Dela Cruz ro napilian nga bag-ong presidente it APIOA para sa terminong 2024-2026.
“Ru pagserbisyo hay isaeang ka pribilihiyo para sa pilang bato eamang dahil bukon tanan hay nataw-an it tsansa para maangkon raya. Bilang napilian ninyo nga mangin president it APIOA hay mabug-at raya nga ubra bangud mabahoe ag importante ro papel it komunikasyon sa sosyodad kung siin mapangibabaw nana kara ro kamatuoran ag malikawan du mga bukon it matuod nga impormasyon,” hambae ni Dela Cruz.
Gindugang nana nga ro pagpanguna sa APIOA hay mabudlay nga ubra pero ana raya nga hantop sa tagipuson nga ginabaton ag ana nga ubrahon ro anang pinakamayad para mabalik ro pagsalig nga gintao kana.
Pagagiyahon it anang determinasyon, eksperyensya, ag promisa, kaibahan ro supporta it anang mga isig-kapareho nga mga opisyales ag mga miyembro it asosasyon, positibo si Dela Cruz nga ang APIOA hay makatao it kalidad nga serbisyo sa mga tawo, kapin pa sa pagtao it igsakto, husto, ag matuod nga impormasyon sa publiko.
Si outgoing President Richie Oloroso it Sangguniang Panlalawigan it Aklan nagpabutyag it anang pagpasaeamat sa APIOA ag ginpasiguro anang padayon nga pagsuporta sa organisasyon.
Ro iba pang mga opisyales nga napilian hay sanday Edgar M. Prado it Aklan State University – Ibajay bilang Vice-President; Ma. Beth Julievern T. Revesencio it Department of Public Works and Highways – Aklan bilang Secretary; ag Niña Faye R.Culajara it Philippine Statistics Authority -Aklan, Treasurer.
Si Megan Bernadeth B. Magno it Bureau of Fisheries and Aquatic Resources – Aklan mat-a ro hapilian nga mangin Assistant Secretary Treasurer; samtang si Mary Jane I. Mondia (National Police Commission Aklan), Auditor; ag si Chrispin Raymund B. Gerardo it Commission on Elections – Aklan ro bag-ong Public Relations Officer.
Sa kaparehas nga okasyon, ro mga information officers it gobyerno sa Aklan hay gin-impormahan sa financial literacy awareness kung siin ginpamayad kara ro andang kaaeaman ag abilidad sa financial management.
Gintigayon ni Dr. Carlo Ben Losande, isaea ka ophthalmologist ag sangka Insurance Adviser ro nasambit nga informative talk.
Ginahikayat ni Losande ro mga miyembro it APIOA nga itaeana ro andang pinansyal nga mga prayoridad ag sayuron gid kung ano ro andang mga kinahangeanon sa kung ano ro andang gusto eamang. Nagtao man imaw it workshop sa mga partisipante para sa mas aktibong partisapasyon ag interaksyon ag para mas maapresyar ro mga lektyur. (AGP/SQP/PIA Aklan)
