SYUDAD SANG ILOILO (PIA) — Masobra sa 200 ka mga iskolar sang Department of Science and Technology (DOST) 6 nga nag-gradwar nga may latin honors ang ginpasudunggan sa ginhiwat nga In Touch With Excellence para sa academic year 2023-2024.
Tuigan nga ginahiwat ang ini nga aktibidad bilang pagkilala sa talalupangdon nga mga kadalag-an sang mga scholar-graduates ilabi man ang pagpakita sang ila dedikasyon, tanda may potensyal sila nga mangin lider kag innovator sa patag sang siyensiya kag teknolohiya.
Sa iya nga mensahe, ginpakigbahin ni DOST 6 regional director Rowen Gelonga ang importansya sang pagserbisyo sa publiko pinaagi sa talento kag kinaadman.
“True and real greatness lies in using your talents and gifts not just for yourself but in service of others. Your education, skills, and intellect are powerful tools but they are meant to uplift communities, to inspire others, and create a better future for the country,” pahayag ni Gelonga.
Nalakip man sa ginpasidunggan ang mga DOST scholars nga nangin topnotchers sang mga Professional Licensure Examinations.
Sa pihak nga bahin, tuman ang kalipay ni Myxezh Anjiela Dagang BS. Biology graduate sang Central Philippine University (CPU) sa kahigayonan nga mangin isa ka DOST scholar kag nagtapos bilang Cum Laude.
“The scholarship has given me opportunities in terms of workshops, financial help. It has also helped me to excel not only in my academics but also in my social skills,” suno kay Dagang.
Si Dagang ang naga-eskwela sa karon sa kurso nga Medicine sa West Visayas State University. (AAL/LMLE/PIA Iloilo)
