SYUDAD SANG ILOILO (PIA) – Nagpatigayon ang Department of Labor and Employment (DOLE) 6 sang damlag lang sang tatlo ka “Project Angel Tree” nga mga aktibidades sa Iloilo City kag isa sa kabanwahanan sang Tigbauan kag Concepcion sa Iloilo bilang pagdumdom sa National Children’s Month kag pamaagi para mapabutyag ang kapaskwahan sa mga komunidad.
Ang ini nga mga hilikuton nangin posible sa pagpanguna sang DOLE kaupod ang Iloilo City Council Against Child Labor, PESO-Iloilo City, Bidlisiw Foundation Inc.- Philippines, PESO-Tigbauan, kag PESO-Concepcion.
Nakabaton ang 254 ka mga kabataan kag ang ila mga pamilya sang nagkalainlain nga bulig halin sa mga nagtililingob nga ahensya.
“This is part of DOLE Child Labor Prevention and Elimination Program, which aims to prevent, reduce, and eventually eliminate child labor in the Philippines through direct intervention or referrals to appropriate agencies and organizations,” suno kay DOLE 6 Regional Director Atty. Sixto Popoy Rodriguez Jr.
Nalakip sa aktibidad ang advocacy campaign batok sa child labor, paghatag sang regalo sa mga kabataan, kag pagpanghatag sang livelihood checks kag livelihood items para sa mga ginikanan sang child laborers.
May ara man nga learning sessions nga ginpatigayon ang Iloilo Field Office, PDA-Iloilo Chapter, MORE Electric Power Corporation, MSWDO kag MHO sang Tigbauan, Iloilo, libre nga haircut sang Philippine Army, Office of the LGBTQ Affairs-Iloilo City, kag Tigbaw Pride.
Subongman, may yara nga medical drive sa pagpanguna sang Department of Health Western Visayas Center for Health Development, Iloilo City Health Office, kag Municipal Health Office of Tigbauan, Iloilo, kag dental drive paagi sa Philippine Dental Association-Iloilo Chapter. (AAL/AGP/ PIA 6 kalakip ang mga balita gikan sa DOLE 6)
