SYUDAD SANG ILOILO (PIA) – Naglab-ot sa 82 ka mga kwalipikado nga katigulangan sa una nga distrito sang probinsya sang Iloilo, lakip ang isa ka centenarian sa banwa sang Igbaras, ang nakabaton sang cash gift sa idalum sang Expanded Centenarians Act of 2024 sang Pebrero 26, 2025.
Sa ginhiwat nga programa sa Miag-ao, Iloilo, ginpahayag ni National Commission of Senior Citizens (NCSC) – 6 Project Development Officer IV Gretchen Anne T. Orbista nga may kabug-usan nga 421 ka mga benepisyaryo sa syudad kag probinsya sang Iloilo ang kwalipikado para sa programa, kun sa diin magahiwat man sila sang payouts sa tagsa ka distrito.
Gindugang pa sini nga ang mga senior citizen nga naga-edad 80, 85, 90, kag 95 ang magabaton sang P10,000, samtang ang mga centenarians naman nagapabilin nga magabaton sang ila P100,000 nga benepisyo.
Nagpabutyag naman si Rosenica Sargena, 80, sang pagpasalamat sa gobyerno kag ginpahayag nga gamiton niya ang kuwarta nga iya nabaton sa pagbakal sang iya mga bulong.
“Pasalamat gid ako kay nakabaton ako diyes mil (P10,000). Daad palawigon pa ako para makabaton naman ti sien (P100,000),” dugang pa ni Sarjena.
Sa pihak nga bahin, ginhatagan pagtamod ni Presidente Ferdinand Marcos, Jr. sa iya mensahe nga gin-stream live gikan sa Palasyo sang Malacañang ang importansya sang pagpasiguro sang kaayuhan sang mga senior citizens.
“Sa ating mga seniors, nawa’y magkaroon kayo ng marami pang panahon ng kagalakan kasama ang inyong mga minamahal sa buhay. Hiling ko rin na magkaroon po kayo ng mga mas matatamis na kuwento na ibabahagi sa susunod na henerasyon,” siling ni Marcos.
Ang iban pa nga benepisyo sa idalum sang Expanded Senior Citizens Act nagalakip sang lima ka porsyento tubtub 20 porsyento nga diskwento sa nagkalain-lain nga serbisyo; lima ka porsyento nga diskwento para sa mga utilities pareho sang konsumo sang tubig kag kuryente tubtob sa gintalana nga mga limitasyon; kag 20 porsyento nga diskwento sa transportasyon, bulong, kag serbisyo sa pag-atipan sa ikaayong lawas. Nagapati si Marcos nga ang mga benepisyo nga ini ang pila lang sa mga solusyon sa pinansyal nga problema sang mga tigulang.
Samtang, magluwas sa paghatag sang cash incentives, pila ka mga national government agencies sa Iloilo ang nagpalab-ot man sang ila serbisyo sa publiko, ilabi na sa mga katigulangan nagikan sa mga banwa sang Oton, Tigbauan, Guimbal, Miag-ao, Igbaras, Tubungan, kag San Joaquin.
Lakip sa mga ahensya nga nagpasakop sa kahiwatan amo ang Philippine Statistics Authority (PSA), Government Service Insurance System (GSIS), Social Security System (SSS), Public Attorney’s Office (PAO), Department of Information and Communications Technology (DICT), PHILHEALTH, Department of Health (DOH), kag Iloilo Provincial Government Environment and Natural Resources Offices (IPGENRO).
Naghatag man sang security assistance ang Armed Forces of the Philippines para sa kahiwatan kag nagtanyag sang libre nga haircut kag medical assistance sa mga tigulang; samtang ang mga staff gikan sa Iloilo Science and Technology University (ISAT-U) Miag-ao campus ang nagtanyag sang nail care services sa mga benepisyaryo. (AAL/JNH/PIA Iloilo)
