BACOLOD CITY (PIA) – Nagapangandam ang Philippine Institute of Volcanology and Seismology (Phivolcs) sa mga otoridad kag komunidad malapit sa Bulkan Kanlaon sang risgo nga dala sang Pyroclastic Density Currents (PDC).
Sa hazard map nga ginpaguwa sang Phivolcs, may anom ka mga munisipyo kag siyudad sa Negros Island Region (NIR) nga posible maapektuhan sang PDC ukon ang makahalalit nga kombinasyon sang materyales gikan sa bulkan, kaangay sang abo kag mainit nga gas, nga madasig nga nagadausdos sa palibot sang bulkan gikan sa iya baba.
Ang ini nga mga lugar amo ang La Castellana, La Carlota, Bago, Moises Padilla, kag Pontevedra sa Negros Occidental, kag Canlaon City naman sa Negros Oriental.
Masami pinaka-apektado sang pag-alburoto sang Kanlaon, ang La Castellana may yara sang siyam ka mga barangay nga pwede malab-ot sang PDC: Sag-ang, Camandag, Mansalanao, Manghanoy, Cabacungan, Puso, Biaknabato, Masulog, kag Cabagnaan; kag Robles bilang buffer zone.
Sa La Carlota, nasakupan sang PDC hazard zone ang Ara-al, Haguimit, kag San Miguel, kaupod ang Yubo, La Granja kag Balabag bilang buffer zone; sa Bago City, Ilijan kag Binubuhan ang yara sa PDC hazard zone, kaupod ang Mailum, Ma-ao Barrio, kag iban nga bahin sang Ilijan kag Binubuhan bilang buffer zones.
Sa Moises Padilla naman, Magallon Cadre, Odiong, Guinpana-an, kag Montilla, kaupod ang Quintin Remo, Macagahay, kag bahin sang Odiong kag Magallon Cadre bilang buffer zones; kag, sa Pontevedra, Buenavista Rizal kag Zamora bilang buffer zones.
Samtang, sa Canlaon City sa probinsya sang Negros Oriental, yara man sa PDC hazard zone ang Pula, Linothangan, kag Masulog, kaupod ang Malaiba, Mabigo, kag Budlasan bilang buffer zones.
Sa report sang Philvolcs alas-12 sang aga sang Enero 24, nakapaidalom sa gihapon sa Alert Level 3 ang Bulkan Kanlaon kag posible pa ang pagpataas sini sa Alert Level 4.
Sa nagligad nga 24 oras, may narekord nga isa ka pagbuga sang abo nga naglawig 36 minutos kag 14 ka volcanic earthquakes.
Bangod sini, ginaagda sang Regional Inter-Agency Coordinating Cell (RIACC) kag Regional Task Force Kanlaon ang internally displaced persons (IDPs) nga magpabilin sa evacuation centers, mangin alerto kag preparado sa tanan nga tion, kag magsunod sa mga abiso sang otoridad. (AGP/BPS/PIA Negros Occidental)
